«Նախաքննության շահերից ելնելով՝ նոր բան ասել չեմ կարող»․ Սուրեն Պապիկյանը՝ զինծառայողի մահվան դեպքի մասին
«Այն, ինչ հայտարարվել է, ավելին հայտնել չեմ կարող, որովհետև հարցը քննչական կոմիտեի տիրույթում է»։ Այս մասին հայտնեց ՀՀ պաշտպանության նախարար Սուրեն Պապիկյանը՝ լրագրողների հետ ճեպազրույցի ընթացքում անդրադառնալով դեկտեմբերի 12-ին տեղի ունեցած զինծառայողի մահվան դեպքի մասին հարցին։
«Նախաքննության շահերից ելնելով՝ նոր բան ասել չեմ կարող։ Իհարկե, ցավում եմ դեպքի առնչությամբ, բայց նոր բան ասել չեմ կարող»,- նշեց նախարարը։
Քննադատությունները շատ են, որ նախարարությունը շարունակում է այն գործելակերպը, երբ ինչ-որ դեպք է լինում, որակում են որպես ինքնասպանության փորձ և տարիներ շարունակ չեն բացահայտվում։ Հարցին ի պատասխան՝ Սուրեն Պապիկյանը հայտարարեց․ «Հենց դրա համար մենք փորձում ենք գնահատականներ չտալ, որպեսզի նման հարցեր չծագեն, գնահատողը մենք չենք, դրա համար կան մարմիններ, որոնք պետք է տան այդ գնահատականները»։
Հիշեցնենք, որ դեկտեմբերի 12-ին՝ ժամը 16:00-ի սահմաններում, հայտնաբերվել էր զինծառայող Սմբատ Մհերի Կիրակոսյանի դին՝ հրազենային վնասվածքով:
Սուրեն Պապիկյանն անդրադաձավ նաև այն հարցին, թե այս օրերին սահմանին վերահսկողությունը խստանում է, և ի՞նչ են անում, որպեսզի սահմանին լարվածություն չառաջանա։
Ըստ նախարարի, սահմանին շատ հանգիստ է և պատրաստվում են Ամանորին։
«Չեմ կարծում, որ հիմա կարող է ինչ-որ լարվածություն լինել, սահմանին շատ հանգիստ է և պատրաստվում ենք Ամանորին, այո՛, տոնական օրերին ծառայությունն ավելի զգոն է, բայց հաշվի առնելով եղանակային պայմանները՝ քամին, բուքը, այլ մտահոգություններ ունի զինված ուժերն այսօր, և մենք մեր առօրյա խնդիրներով ենք զբաղված, հիմա քամին ու բուքն է խնդիրը։
Եթե Երևանում կամ հարակից մարզերում ձյուն չկա, ապա բարձրադիր հատվածներում կա ձյուն։ Մենք մինչև 3500 մետր բարձրության դիրքեր ունենք, հաշվի պետք է առնենք, որ այնտեղ ձյունը հալվում է ամռանը, իսկ հոկտեմբերին կարող են ձյան շերտեր տեսանելի լինել։ Մեր բոլոր դիրքերի ճանապարհները մշտապես փակվում են, և ամեն ինչ արվում է, որ բանակային դիրքեր տանող ճանապարհները մշտապես բաց լինեն»,- ընդգծեց Պապիկյանը։
Նորություններ
