Երեխա ունեցող ընտանիքներին բնակարանային ապահովության ծրագրերի համար լրացուցիչ 500 մլն դրամ կհատկացվի
Կառավարությունն այսօրվա նիստում ընդունել է որոշում, որով լրացուցիչ 500 միլիոն դրամ է կհատկացվի երեխա ունեցող ընտանիքների բնակարանային ապահովության պետական աջակցության ծրագրերին, այդ թվում՝ մարզում հիփոթեքի աջակցության և հիփոթեքի մարման աջակցության համար։ Այս մասին տեղեկացնում են կառավարությունից։
Գորածդիրն այս որոշման ընդունումը պայմանավորում է ծրագրերից օգտվելու համար դիմող քաղաքացիների թվի աննախադեպ աճով և եղած ցուցանիշների հիման վրա կատարված կանխատեսումներով։
Հատկացված միջոցները հնարավորություն կտան ֆինանսական աջակցություն տրամադրել 2026 թվականի 3-րդ և 4-րդ եռամսյակներում դիմած շուրջ 626 շահառուի։
Լրացուցիչ հատկացվող 500 մլն դրամը կբաշխվի հետևյալ ուղղություններով․
- 170 շահառու աջակցություն կստանա մարզերում հիփոթեքային վարկով բնակարան ձեռք բերելու ծրագրով (յուրաքանչյուրին՝ միջինում 1 մլն դրամ)։
- 120 շահառու կընդգրկվի կանխավճարի ապահովագրության ծրագրում (յուրաքանչյուրին՝ միջինում 30 հազար դրամ)։
- 336 շահառու աջակցություն կստանա գործող հիփոթեքի մայր գումարի մարման ծրագրով (յուրաքանչյուրին՝ միջինում 970 հազար դրամ)։
Աշխատանքի և բարեկեցության նախարար Արսեն Թորոսյանը ներկայացրել է ծրագրի ընդհանուր վիճակագրությունը՝ նշելով, որ 2020 թվականի մայիսին մեկնարկած ծրագրից մինչ օրս օգտվել է 17,609 շահառու։ Ընդհանուր առմամբ տրամադրվել է 13,2 մլրդ դրամի աջակցություն՝ երեխա ունենալու, ինչպես նաև մարզային բնակավայրերում բնակարան ձեռք բերելու կամ կառուցելու նպատակով։ Միայն 2026 թվականի ընթացքում փոխհատուցում է ստացել 2 425 շահառու։
Նախարարի խոսքով՝ գործող ծրագիրը նախատեսվում է ավարտել ընթացիկ տարվա վերջին, սակայն դրա բարձր արդյունավետությունն ու ընտանիքների վրա ունեցած դրական ազդեցությունը հաշվի առնելով՝ այժմ մշակվում է նոր ծրագիր։ Այն կհիմնվի գործող ծրագրի տրամաբանության վրա՝ մշտադիտարկման արդյունքում դուրս բերված անհրաժեշտ փոփոխություններով, և առաջիկայում կներկայացվի Կառավարության քննարկմանը։
