Թոմ Հարդին՝ Երևանո՞ւմ. հայտնի դերասանը կարող էր մենամարտել Արման Ծառուկյանի հետ
«Վենոմ», «Խավարի ասպետը» և «Խելագար Մաքս» ֆիլմերի աստղ, բրիտանացի հայտնի դերասան Թոմ Հարդին կարող էր պրոֆեսիոնալ գրեփլինգում իր նորամուտը նշել Երևանում՝ մրցելով UFC-ի թեթև քաշային կարգի առաջատար մարտիկ Արման Ծառուկյանի դեմ Hype FC մրցաշարի շրջանակում:
Այս անսպասելի առաջարկի մասին բարձրաձայնել է Hype FC լիգայի ղեկավարներից Արման Մարտիրոսյանը՝ սոցցանցերում հրապարակելով հոլիվուդյան աստղի հետ նամակագրությունից մի հատված։ Ըստ Մարտիրոսյանի՝ Հարդիին դիտարկում էին որպես Շարա Բուլետին փոխարինող՝ դեկտեմբերյան մրցաշարի համար։
Անձնական նամակագրության մեջ դերասանը շնորհակալություն է հայտնել առաջարկի համար, սակայն ստիպված է եղել մերժել զբաղվածության պատճառով.
«Արման, նախ՝ սա շատ շռայլ առաջարկ է։ Որտեղի՞ց և ինչո՞ւ է այն ծագել։ Կարծես թե սա շատ ավելի մեծ գումար է, քան սովորաբար վաստակում է BJJ պրակտիկայով զբաղվող ցանկացած պրոֆեսիոնալ մարզիկ: Բայց խոսքը դրա մասին չէ… Մարտից մինչ օրս ես խիստ զբաղված եմ նկարահանումներով, այնպես որ… Շատ շնորհակալ եմ, որ մտածել եք իմ մասին»:
Նշենք, որ Թոմ Հարդին հայտնի է որպես բրազիլական ջիու-ջիցուի մեծ երկրպագու. նա պարբերաբար մարզվում է, ունի կապույտ գոտի և նույնիսկ մասնակցել է գրեփլինգի բարեգործական մրցաշարերի:
Հիշեցնենք, որ ի վերջո Արման Ծառուկյանը Երևանում մրցեց Շարա Բուլետի հետ: Վեց րոպե տևած գոտեմարտն անցկացվեց միայն ցավեցնող/խեղդող հնարքներով կանոններով: Մարտիկներից ոչ մեկին չհաջողվեց վճռորոշ հնարք կատարել, և դիմակայությունն ավարտվեց ոչ-ոքի:
