Պուտինն ասում է, որ ԱՄՆ ծրագիրը կարող է Կիևի հետ համաձայնագրի «հիմքը» լինել, սակայն սպառնում է ուժով գրավել Դոնբասը, եթե ուկրաինական զորքերը դուրս չգան

Ռուսաստանը կդադարեցնի Ուկրաինայի դեմ պատերազմը միայն այն դեպքում, եթե ուկրաինական բանակը դուրս գա Դոնբասից։ Այս մասին հայտարարել է ՌԴ նախագահ Վլադիմիր Պուտինը նոյեմբերի 27-ին Բիշքեկ կատարած այցից հետո տեղի ունեցած մամուլի ասուլիսում։

«Ուկրաինական զորքերը դուրս կգան իրենց կողմից օկուպացված տարածքներից, այդ ժամանակ էլ մարտերը կդադարեն։ Եթե նրանք դուրս չգան, մենք դրան կհասնենք զենքի ուժով»,-ասել է Պուտինը։ Նրա խոսքով՝ Մոսկվան պատրաստ է գրավոր խոստում տալ՝ չհարձակվել Եվրոպայի վրա։

Ղրղզստանի մայրաքաղաք Բիշքեկում ՀԱՊԿ գագաթնաժողովից հետո ասուլիսում Պուտինը հայտարարել է, որ Ուկրաինայում պատերազմը դադարեցնելու ԱՄՆ-ի ծրագիրը կարող է «հիմք հանդիսանալ ապագա համաձայնագրերի համար»։ Նա հայտարարել է, որ ամերիկյան կողմը առաջարկվող 28 կետերը բաժանել է չորս բաժնի և դրանք փոխանցել է Մոսկվային։ Սակայն վերջնական որոշումներ դեռևս չեն կայացվել։

Պուտինը հաստատել է, որ Կրեմլը սպասում է, որ հաջորդ շաբաթվա սկզբին Մոսկվա կայցելի ԱՄՆ պատվիրակությունը՝ հատուկ դեսպանորդ Սթիվ Վիտկոֆի գլխավորությամբ, հավելելով, որ Կրեմլը պատրաստ է «լուրջ քննարկման»։

Սակայն, ինչպես նկատում է CNN-ը, արագ առաջընթացի հավանականությունը փոքր է,  այն բանից հետո, երբ Պուտինը կրկնել է իր ծավալապաշտական  ​​պահանջները՝ ասելով, որ Ուկրաինայում պատերազմը կավարտվի միայն «երբ ուկրաինական զորքերը դուրս գան իրենց կողմից գրավված տարածքներից»։

Ուկրաինայի նախագահ Վլադիմիր Զելենսկին հայտարարել է, որ իր պատվիրակությունը շաբաթվա վերջին կհանդիպի նաև ամերիկացի պաշտոնյաների հետ՝ Ժնևում քննարկված կետերը քննարկելու համար: Իր երեկոյան տեսաուղերձում Զելենսկին հավելել է, որ հաջորդ շաբաթ տեղի կունենան «կարևոր բանակցություններ ոչ միայն Ուկրաինայի  պատվիրակության, այլև անձամբ իր համար», առանց լրացուցիչ մանրամասներ հաղորդելու:

Միաժամանակ, Reuters-ը գրում է՝ ռուսական առաջարկների վրա հիմնված ԱՄՆ 28 կետանոց սկզբնական ծրագիրը զգալիորեն կրճատվել է Կիևի և Վաշինգտոնի միջև խորհրդակցություններից հետո: Ուկրաինան մերժել է Մոսկվայի երեք հիմնական պահանջները՝ սահմանափակել Ուկրաինայի զինված ուժերի թվաքանակը, հրաժարվել ՆԱՏՕ-ի անդամակցությունից և հանձնել Դոնբասը: Ուկրաինայի նախագահ Վլադիմիր Զելենսկին փորձել է քննարկել վիճելի հարցերը ԱՄՆ նախագահ Դոնալդ Թրամփի հետ, սակայն Թրամփը անտեսել է նրա հայտարարությունները Վաշինգտոն մեկնելու իր պատրաստակամության մասին:

Ռուսաստանը գրավել է միջազգային իրավունքով ճանաչված Ուկրաինայի ինքնիշխան տարածքի մոտ 20%-ը, ներառյալ Լուգանսկի մարզը գրեթե ամբողջությամբ, Դոնեցկի, Խերսոնի և Զապորոժյեի մարզերի մի մասը։

Մոսկվան պահանջում է, որ Ուկրաինան հանձնի այս չորս մարզերն ամբողջությամբ, որոնք նա բռնակցել է, բայց լիովին չի նվաճել։