Խոշոր հրդեհ Վաղատուրում․ կրակը մարվել է կեսգիշերն անց
Տեղ համայնքի Վաղատուր բնակավայրի բնակիչ Հարություն Հովսեփյանի 100 ք/մ տարածքով փայտաշեն պահեստում, որտեղ անասնակեր էր պահեստավորված, հունվարի 30-ին հրդեհ էր բռնկվել։ Գորիսի փրկարար ծառայությունը ժ․15։15-ին հաղորդում է ստացել, որ հրդեհ է բռնկվել Վաղատուր բնակավայրում, որտեղ մեկնել է 2 մարտական հաշվարկ` ջոկատի հրամանատար Անդրանիկ Սահակյանի գլխավորությամբ։
Ինչպես հայտնում է REGIONS TV-ն, ժ․16։00-ին փրկարարները սկսել են հրդեհաշիջման աշխատանքներն այրվող պահեստում, որտեղ գտնվել է խոտի ավելի քան 1000 տուկ՝ նախատեսված մանր ու խոշոր 40 եղջերավոր անասունների համար։
Պահեստն ամբողջությամբ այրվել է։ Այնուհետ կրակը տարածվել է՝ ընդգրկելով խոտածածկ տարածքներ։ Փրկարարների շնորհիվ կրակի ճիրաններից փրկվել են Հովսեփյանի տունն ու հարակից տարածքների կառույցները։
Գորիսի փրկարարների և գյուղի բնակիչների համակարգված աշխատանքի շնորհիվ կրակն ամբողջությամբ մարվել է կեսգիշերն անց։ Հրդեհի պատճառներն առայժմ պարզված չեն։
