«Թրամփը նշել է, որ պատերազմի ավարտի համար Ուկրաինան պետք է զիջի Ղրիմը և համաձայնվի երբեք չմիանալ ՆԱՏՕ-ին»․CNN
Եվրոպական առաջնորդները ժամանում են Վաշինգտոն՝ աջակցելու Ուկրաինայի նախագահ Վլադիմիր Զելենսկուն, ով այսօր Սպիտակ տանը հանդիպելու է ԱՄՆ նախագահ Դոնալդ Թրամփին։
CNN-ը գրում է․ «Թրամփը նշել է, որ պատերազմի ավարտի համար Զելենսկին պետք է համաձայնի Ռուսաստանի որոշ պայմանների հետ, այդ թվում՝ Ուկրաինան պետք է զիջի Ղրիմը և համաձայնվի երբեք չմիանալ ՆԱՏՕ-ին»:
The New York Times-ը գրում է․«Ուկրաինայի նախագահ Վլադիմիր Զելենսկին, որն երեքուկես տարի պատերազմի մեջ է Ռուսաստանի հետ, սպասվում էր, որ նախագահ Թրամփից դժվար ընտրության առաջ կկանգնի՝ կամ հողերը զիջել Ռուսաստանին՝ Ուկրաինայի ապագա անվտանգության վերաբերյալ ԱՄՆ խոստումների դիմաց, կամ պահպանել իր դիրքորոշումը՝ ռիսկի դիմելով կրկին բորբոքել պարոն Թրամփի զայրույթը»։
Նույն աղբուրը նշում է, որ «դաշնակիցների շրջանում տագնապի նշանի ներքո, եվրոպացի առաջնորդների մի խումբ, այդ թվում՝ Մեծ Բրիտանիայից Քեյր Սթարմերը, Իտալիայից Ջորջիա Մելոնին և ՆԱՏՕ-ի գլխավոր քարտուղար Մարկ Ռյուտեն, ժամանեցին Սպիտակ տուն Զելենսկիից առաջ՝ Թրամփի հետ առանձին հանդիպման համար: Նրանք և այլ բարձրաստիճան եվրոպացի պաշտոնյաներ շտապել էին Վաշինգտոն՝ փորձելով ցույց տալ համերաշխություն Ուկրաինայի հետ և «պաշտպանելու եվրոպացիների շահերը», ըստ Եվրոպայի մեկ այլ ներկայացուցչի՝ Ֆրանսիայի նախագահ Էմանուել Մակրոնի»։
Լրատվամիջոցը հիշեցնում է՝ մի շարք բարձրաստիճան եվրոպացի պաշտոնյաներ զգուշացրել են՝ «եթե պարոն Պուտինին չկանգնեցնեն Ուկրաինայում, նա, ի վերջո, կարող է փորձել ուժով գրավել ավելի շատ եվրոպական տարածքներ»:
