Սամվել Կարապետյանը նոր քաղաքական ուժով կմասնակցի ընտրություններին
«Տաշիր գրուպ» ընկերության փոխնախագահ Նարեկ Կարապետյանն այսօր հրավիրված ասուլիսում հայտարարեց «Մեր ձևով» կամավորական շարժման մեկնարկի մասին:
Նա նշեց, որ սա ապաքաղաքական կամավոր միավորում է լինելու: Ընթերցվեց Սամվել Կարապետյանի օգոստոսի 13–ի ուղերձից մի հատված, որտեղ ասվում է․
«Մեր ձևով» շարժումը դառնալու է այն հենքը, որի վրա կձևավորվի նոր քաղաքական ուժը, ուժ, որի կարիքը բոլորն են զգում այսօր։ Մեր ծրագրերը հաստատուն են, մենք շարունակելու ենք մեր ձևով»։
Նարեկ Կարապետյանը հավելեց, որ «Մեր ձևով» շարժման հիմնադրումը չի ենթադրում, որ իրենք նոր քաղաքական ուժ չեն ստեղծելու. «Հայաստանում առաջիկայում սպասվում են ընտրական գործընթացներ եւ դրանց մասնակցության առավել հարմար ձեւը կուսակցության միջոցով ներգրավվելն է՝ պետական ծրագրերի իրականացման համար համապատասխան ծրագրեր առաջարկելով։ Վստահ ենք, որ 2026-ի ընտրական գործընթացներում կկարողանանք արժանի արդյունքի հասնել»։
