ՀՀ չի ներմուծվում և չի օգտագործվում միջազգային պայմանագրերով արգելված պեստիցիդներ․ Հայաստանում արտադրված ցանկացած միրգ-բանջարեղեն կարող եք հանգիստ ուտել․Նիկոյան
Սննդամթերքի անվտանգության տեսչական մարմնի իրականացրած ուսումնասիրությունը՝ ՀՀ-ում կիրառվող պեստիցիդների մասին, թյուրընկալում է առաջացրել․լրատվամիջոցներում ու սոցիալական ցանցերում կարծիքներն են շրջանառվում, թե Հայաստանում արտադրվող միրգ-բանջարեղենում պեստիցիդների քանակը գերազանցում է թույլատրելիի սահմանը։
Այսօր հրավիրված ասուլիսում ՍԱՏՄ բուսասանիտարիայի վարչության պետ Արթուր Նիկոյանը պարզաբանեց՝ ՀՀ չի ներմուծվում, չի գրանցվում և չի օգտագործվում այնպիսի պեստիցիդներ, որոնք միջազգային պայմանագրերով արգելված են։
Անդրադառնալով շրջանառվող մոլորեցնող լուրերին, Նիկոյանն ասաց․«Գրում են, որ տասը նմուշ է փորձաքննվել, տասում էլ հայտնաբերվել են պեստիցիդներ։ Դրանք կիրառվել են այդ մշակաբույսի մշակման ժամանակ, բնակաբար, պետք է հատանբերվեին։ Հնարավոր չէ պեստիցիդ կիրառել ու մնացորդը զրո լինի։ Դրա համար էլ մնացորդային քանակների սահմաններ կան։ Խնդիրն այն է, որ թույլատրելի սահմանները չպետք է գերազանցեն»։
Նրա խոսքով՝ եթե ՍԱՏՄ-ն ստուգել է մի պտղի կամ բանջարեղենի մեջ տասը անուն պեստիցիդ, և տասից ինի դեպքում նորման չի գերազանցվել, ընդամենը մեկ անուն պեստիցիդն է, որ 5-20 տոկոսով է գերազանցել, դա վատ ցուցանիշ չէ․«Իհարկե, այն չէ, ինչ մենք ենք ուզում, աշխատելու տեղ ունենք, բայց չի կարելի ասել, որ սարսափելի վիճակ է»։
Նիկոյանի ներկայացմամբ՝ շահարկվում է, թե «քաղցկեղածին խնձոր ենք ուտում, քաղցկեղածին միրգ ենք ուտում․«Իհարկե, աշխարհում պեստիցիդների մեջ կան այնպիսինները, որոնք քաղցկեղածին են՝ սաղմնաթունային, մուտագեն և այլն, բայց ՀՀ-ն վաղուց Ռոտերդամի և Ստոկհոլմի կոնվենցիաների անդամ երկիր է։ Կոնվենցիայի ցանկում եղած արգելված պեստիցիդները ՀՀ-ում նույնպես անմիջապես արգելվում են։ Այնտեղ ձևակերպում կա՝ «արգելում կամ սահմանափակում», իսկ մենք նույնիսկ չենք սահմանափակում, մենք միանգամից արգելում ենք։ Հետևաբար՝ Հայաստան չի ներմուծվում, չի գրանցվում, չի օգտագործվում այնպիսի պեստիցիդ, որը միջազգային պայմանագրերով արգելված է»։
Նիկոյանը վստահեցրեց՝ Հայաստանում արտադրվող ցանկացած միրգ-բանջարեղեն կարող եք հանգիստ ուտել.«Պեստիցիդ, նիտրատները եղել են, կան ու կլինեն։ Խնդիրը դրանց մնացորդային քանակներն են։ Կարևորն այն է, թե մարդն օրական ինչքան է օգտագործում: Սննդաբանները խորհուրդ են տալիս օրական 400-500 գրամ միրգ- բանջարեղեն օգտագործել։ Եթե մեկը շատ ձմերուկ է սիրում ու օրական 4 կիլոգրամ է ուտում, ապա որքան էլ նիտրատների քանակությունը նորմայի մեջ լինի, ընդունելու է օրգանիզմի համար վնասակար չափաբաժին»:
