World Challenge Cup. Համլետ Մանուկյանը՝ ոսկե, Արթուր Ավետիսյանը՝ արծաթե մեդալակիր
Ֆրանսիայի մայրաքաղաք Փարիզում ավարտված սպորտային մարմնամարզության «World Challenge Cup» հեղինակավոր մրցաշարը հաղթական է ստացվել Հայաստանի հավաքականի ներկայացուցիչների համար. հայ մարզիկները մրցահարթակից հեռանում են ոսկե և արծաթե մեդալներով։
Նժույգ թափեր վարժությունում անգերազանցելի էր Եվրոպայի չեմպիոն Համլետ Մանուկյանը։ Հայ մարմնամարզիկը եզրափակիչում ցուցադրեց անթերի ելույթ՝ վաստակելով 15.200 միավոր և հռչակվելով մրցաշարի հաղթող։ Այս մրցաձևում նրա հիմնական մրցակիցը իտալացի Տարգետան էր, որը 15.000 միավորով բավարարվեց միայն արծաթե պարգևով։
Օղակների վարժությունում Հայաստանի հավաքականի մեդալային պաշարը համալրեց Եվրոպայի նորընծա չեմպիոն և աշխարհի գավաթակիր Արթուր Ավետիսյանը։ Նա դրսևորեց բարձր վարպետություն և 14.533 միավորով կանգնեց պատվո հարթակի երկրորդ աստիճանին։ Այս կարգապահությունում ոսկե մեդալը բաժին հասավ Ռուսաստանը ներկայացնող Զայկային, ով 14.566 արդյունքով չնչին առավելության հասավ հայ մարզիկի նկատմամբ։
Հավելենք, որ Փարիզում կայացած ստուգատեսին Հայաստանը ներկայացնում էր նաև Գագիկ Խաչիկյանը։ Վերջինս ուժերը չափեց նժույգ թափեր վարժությունում, սակայն որակավորման փուլի արդյունքներով չկարողացավ ապահովել եզրափակիչի ուղեգիր։
