«Առնվազն մինչև մարտ ամիս գազի թանկացում չի լինի, եթե այլ իրավիճակ չլինի»․ ՀԾԿՀ նախագահ
«Այս պահին հանձնաժողովը պաշտոնական գրություն «Գազպրոմ Արմենիայից» կամ ռուսական կողմից չունի։ Ես լիահույս եմ, որ նման բան չի լինի։ Իսկ եթե թանկացում լինի, պետք է հաշվի առնել, որ Հայաստանում էլեկտրաէներգիայի արտադրության մոտ 30-33%-ը բաժին է հասնում ջերմային էլեկտրակայաններին։ Հետևաբար, եթե գազը թանկացավ, ջերմային էլեկտրակայանների սակագինը կբարձրանա՝ կախված գազի գնից»,-այս մասին այսօր խորհրդարանոմ լրագրողների հետ ճեպազրույցում հայտարարել է Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։
Նա ներկայացրեց հանձնաժողովի ուսումնասիրությունը գազի հնարավոր թանակցման ազդեցության վերաբերյալ։ Օրինակ բերեց՝ եթե սահմանի վրա գազի գինը կաճի 30%-ով, այսօրվա 174.4 դոլար է 1000 խորանարդ մետրի համար, կդառնա 226.8 դոլար, ինչը էլեկտրաէներգիայի միջինացված սակագնի վրա կունենա 1.4 դրամի ազդեցություն:
Իսկ եթե ԵԱՏՄ զեկույցում նշված 69% թանկացում լինի, սահմանին գազի գինը կդառնա 294.8 դոլար, էլեկտրաէներգիայի սակագնի վրա կազդի 3.3 դրամով, եթե 300%-ով թանկացում լինի, գազի գինը սահմանին կդառնա 697.8 դոլար, իսկ էլեկտրաէներգիայի միջինացված սակագնի վրա կազդի 14.2 դրամով:
Նա վստահություն է հայտնել, որ գազի մատակարարումը ՀՀ չի դադարեցվի, իսկ եթե դադարեցվի, ապա ստիպված պետք է կարգավորման այլ գործիքներ կիրառվեն, այնպես, ինչպես 90-ականների ճգնաժամային շրջանում․ «Օրինակ՝ Սևանից լրացուցիչ ջրթող անենք, որպեսզի Սևան-Հրազդան հիդրոկասկադն ամբողջ տարին աշխատեցնենք, պետք է արագ բանակցենք Վրաստանից և Վրաստանի միջոցով այլ երկրներից 110 կՎտ օդային գծերով էլեկտրաէներգիա ներկրելու համար: Որոտանի կասկադն ամբողջությամբ պետք է աշխատեցնենք, այս տարվա ջրային ռեսուրսները թույլ են տալիս նման բան անելու»։
Նա վստահեցրել է, որ եթե այլ իրավիճակ չլինի, առնվազն մինչև մարտ ամիս գազի թանկացում չի լինելու, և եթե նույնիսկ հիմա հայտ ներկայացվի, այն վերաբերելի կլինի հաջորդ վերանայման փուլին․«Ձմեռն արդեն դուրս կգա, այսինքն դա վերաբերելի է հաջորդ վեց ամսվան»:
Եթե Գազպրոմը դիմի գազը թանկացնելու հայտով, արդյոք ՀԿԾՀ-ն կարող է մերժել, այս հարցին ի պատասխան էլ Մեսրոպյանն ասել է՝ քանի որ նման հայտ չկա, ու բոանդակությունը հայտնի չէ, ապա միանշանակ պատասխան հնարավոր չէ տալ այդ հարցին․«Պետք է հայտը սեղանին դրված լինի, որ հասկանանք՝ ինչ է գրված, ինչ են ուզում, որպեսզի մենք հասկանանք՝ դա օբյեկտի՞վ պահանջ է, թե՞ քաղաքական, ըստ այդմ էլ հանձնաժողովը որոշում կայացնի։ Իսկ քաղաքական հայտը գնահատողը հանձնաժողվը չէ»։
Ի՞նչ դեր կունենան արևային կայաններն և կուտակիչ մարտկոցները էլեկտրաէնեգիան որպես այլընտրանք գազին․ այս առնչությամբ Մեսրոպյանն ասաց՝ կենցաղային և այլ սպառողների մասով արևային կայանների գումարային հզորությունը հասնում է 783 մեգավատի (շուրջ 61,000 կետ): Սա լուրջ թիվ է, սակայն քանի որ արևային էներգիան արտադրվում է օրվա որոշակի ժամերին և կախված է եղանակից, այն գազի բացակայության կամ ճգնաժամի պարագայում միանշանակ միակ և լիարժեք լուծումը չի կարող հանդիսանալ:
