Փաշինյան․«Մենք պետք է ունենանք մոդուլյար ատոմակայան, որը ՀՀ-ի եւ շրջակա երկրների համար որեւէ կերպ չգնահատվի որպես սպառնալիք»
Համաշխարհային հայկական գագաթաժողովում այսօր ՀՀ վարչապետ Նիկոլ Փաշինյանը անդրադարձավ ՀՀ էներգետիկ անվտանգության խնդիրներին։
Աշխարհում, ըստ Փաշինյանի, էներգետիկ անկախություն չկա, չկա մի երկիր, որ էներգետիկ անկախ է: Խոսք կարող է լինել միայն էներգետիկ դիվերսիֆիկացման մասին։
Նա նաեւ ասել է, որ Հայաստանի Հանրապետությունում էներգետիկ ոլորտում կարևոր նախագծերից մեկը նոր ատոմակայանի կառուցումն է․«Այս հարցում մենք կայացրել ենք ռազմավարական որոշում, որ մենք պետք է ունենանք փոքր տիպի մոդուլյար ատոմակայան։ Ամենակարևոր պատճառներից մեկը, որ որոշել ենք այդպես վարվել․ մասնագետները բացատրեցին, որ մոդուլյար ատոմակայանի հնարավոր վթարը համարվում է տեղային նշանակության միջադեպ։ Դա նշանակում է, որ մոդուլային տեխնոլոգիայով կառուցված ատոմակայանի ներսում, եթե Աստված չանի, վթար է տեղի ունենում, 500 մետր այն կողմ գտնվող բնակավայրի բնակչությանը չեն տարհանում: Այսինքն վթարը միջավայրին չի սպառնում»։
Փաշինյանի ներկայացմամբ՝ մոդուլյար ատոմակայաննոերի տեխնոլոգիայի կիրառման փուլին են հասել մի քանի երկրներ՝ ԱՄՆ-ն ամենաշատ առաջընթաց գրանցած երկիրն է, բայց դրանով զբաղվում է նաեւ Ֆրանսիան, ՌԴ-ն, Հարավային Կորեան․«Մենք աշխատում ենք գործընկերների հետ: Այս պահին մի խնդիր կա․ աշխարհում դեռևս գործող մոդուլյար ատոմակայան չկա, կան կառուցվողներ։ Բայց մեր համոզմունքն այն է, որ սա լինելու է միանշանակ»:
Նրա խոսքով՝ մենք պետք է ունենանք մոդուլյար ատոմակայան, որը և՛ Հայաստանի, և՛ շրջակա երկրների համար որեւէ կերպ չգնահատվի որպես սպառնալիք»։
Փաշինյանը նաեւ նշել է, որ ՌԴ-ից և Իրանից գազ ենք ներկրում, որոշ ժամանակ առաջ Ադրբեջանից հայտարարություններ էին հնչում, որ ապագայում խաղաղության հաստատման դեպքում կարող է Հայաստանը գազ ներկրել նաեւ Ադրբեջանից:
Ըստ Փաշինյանի՝ եթե պատկերացնենք, որ Հայաստանի տարածքով տարանցիկ գազամուղ է անցնում դեպի Նախիջեւան կամ դեպի Թուրքիա, այդ տարբերակները նույնպես չի կարելի բացառել։
