«Քաղաքական հետապնդում է, դատախազությունն իր դիրքորոշումը փոխել է, վարչապետի հայտարարությունների և գուցե հանձնարարության արդյունքում»․փաստաբանը Սրբազանի մեղադրանքի մասին

Միքայել արքեպիսկոպոս Աջապահյանի փաստաբան Արա Զոհրաբյանն այսօր հրավիրված ասուլիսում անդրադառնալով Աջապահյանին  վարչապետի թեկնածու առաջադրելու առաջարկից հրաժարվելուն, մանրամասնեց, թե  ինչպես է կազմվել նրան առաջադրելու հայտարարությունը։

Փաստաբանն ասաց, որ այն պահին, երբ Հայ Առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանը շարժվում էր դեպի Քննչական կոմիտե, լրագրողները նրան հարցրել են այն մասին, որ իրեն որպես վարչապետի թեկնածու են ցանկանում առաջադրել, արդեն Քննչական կոմիտե հասնելիս համացանցում լուրեր էին տարածվում, որ Էդմոն Մարուքյանն առաջարկել է վարչապետի թեկնածու առաջադրել Աջապահյանին։

Զոհրաբյանի ներկայացմամբ՝ Քննչական կոմիտեում «կոնֆիդենցիալ զրույց են ունեցել պաշտպանյալի հետ․« Մենք 5 պաշտպաններով Միքայել Սրբազանի հետ առանձին քննարկել ենք մեր անելիքները։ Մենք այդ մասին էլ ենք խոսել, որ այսպիսի հայտարարություններ կան։ Մեր խնդիրն առաջնահերթ Միքայել սրբազանի շահերն են։ Հիմա տեսեք՝ իրեն մեղադրում են, ասում են դուք ռազմական հեղաշրջման, այսինքն՝ իշխանությունը զավթելու կոչերով եք հանդես եկել, նա ասում է, որ ինքը նման բան չի ասել, իսկ դրան զուգահեռ պրոցես է գնում, որով ասում են, որ ինքը վարչապետի թեկնածու է։ Հիմա պատկերացրեք պաշտպանական կողմի տեսանկյունից. կարծես, ուզում են դիտավորյալ կապակցեն, որ հիմնավորեն այս կոչերի տրամաբանական կապը։ Դրա համար հենց այդտեղ, սրբազանի ներկայությամբ այդ տեքստը կազմվեց և ես այն հրապարակեցի քննչական գործողությունների ավարտից հետո»։

Հիշեցնենք, որ«Լուսավոր Հայաստան» կուսակցության նախագահ Էդմոն Մարուքյանն առաջարկել էր վարչապետին անվստահություն հայտնելու գործընթացում վարչապետի թեկնածու առաջադրել Միքայել արքեպիսկոպոս Աջապահյանին։ Մարուքյանը նշել էր, որ ԱԺ պատգամավորներ Հովիկ Աղազարյանն ու Հակոբ Ասլանյանը, որոնք ավելի վաղ իմպիչմենտի գործընթաց էին նախաձեռնել ու վարչապետի պաշտոնում առաջադրել էին իր թեկնածությունը, պատրաստ են իր փոխարեն թեկնածու առաջադրել Միքայել արքեպիսկոպոս Աջապահյանին։ Ընդ որում, Մարուքյանն այդ առաջարկը հրապարակեց այն օրը, երբ իրավապահները պատրաստվում էին ձերբակալել  Աջապահյանին՝ սահմանադրական կարգը տապալելու և իշխանությունը զավթելու հրապարակային կոչեր հնչեցնելու մեղադրանքով։ Ապա ԱԺ «Հայաստան» խմբակցությունը հայտարարեց, որ իրենք պատրաստ են 28 պատգամավորի ստորագրություններով միանալ իմպիչմենտի գործընթացին՝ վարչապետի պաշտոնում առաջադրելով Միքայել արքեպիսկոպոս Աջապահյանի թեկնածությունը։ Դրանից հետո Աջապահյանը հայտարարեց, որ հրաժարվում է այդ գործընթացից՝ հորդորելով իր անունը չշահարկել վարչապետի թեկնածուների թվում։

Այս հայտարարությունից հետո ԱԺ «Պատիվ ունեմ» խմբակցությունը հայտարարեց, որ պատրաստ է միանալ նախաձեռնությանը՝ բացառապես Միքայել արքեպիսկոպոս Աջապահյանի և Ամենայն Հայոց կաթողիկոսի համաձայնության դեպքում։

Ասուլիսում սրբազանի մեկ այլ փաստաբան Երեմ Սարգսյանն էլ անդրադառնալով մեղադրանքին, ասաց՝ ակնհայտ ապօրինի և ակնհայտ անհիմն մեղադրանք է, և ընդհանրապես հանցագործության հետ կապ չունի․«Սա միայն մեր դիրքորոշումը չէ, սա դատախազության, քննչական մարմինների որոշումն է եղել մինչև այն պահը, երբ վարչապետը սկսել է թիրախավորել Միքայել սրբազանին»։

Փաստաբանը մանրամասնեց՝ ըստ Դատախազության՝ իբր 2025–ի հունիսի 21–ին Սրբազանի հայտարարությունը եւս հանդիսացել է դրա համար հիմք, բայց, ինչպես նկատեց Սարգսյանը, այս գործընթացը իրավապահները սկսել էին հունիսի 4–ին։

« Դատախազությունն իր նախաձեռնությամբ այդ հրապարակումն ուղարկել է ոստիկանություն, ոստիկանությունն իբր թե հաղորդում է պատրաստել, ուղարկել Քննչական, քննչականն էլ  վարույթը նախաձեռնել է։ Երբ հետ ենք գնում, տեսնում ենք, որ հունիսի 3–ին, 4–ին վարչապետն իր էջում ուղիղ թիրախավորում էր Միքայել Սրբազանին։ Մեր իրավապահները մի վատ սովորություն ունեն, տեսնում են՝ ինչ է ցանկանում վարչապետը, իրենք բոլոր այդ ցանկությունները փորձում են իրականություն դարձնել։ Ամսի 4–ի հրապարակումներից հետո իրենք միանգամից տեսան Միքայել Սրբազանի 2024–ի հարցազրույցը, դա վերցրել ու սկսել են շրջանառել»,–ասաց փաստաբանը։

Նրա պնդմամբ՝ սա քաղաքական հետապնդում է, և դատախազությունը իր դիրքորոշումը 360 աստիճանով փոխել է, բացառապես վարչապետի հայտարարությունների և գուցե հանձնարարության արդյունքում»։

«Գրված է, որ 2023 թվականի սեպտեմբերի 26-ի հարցազրույցում ասել է, որ ռազմական հեղաշրջում պետք է արվի, թե չէ Հայաստանը կվերածվի Էրմենիստանի։ Իրենք այս հաղորդումը, երբ որ ուսումնասիրել են, նույն դատախազությունը գրել է, որ դա չի համարում հանցագործություն։ Մեղադրանքի կողմը, քննիչը, դատախազը ասում էին, որ այս ամբողջ հարցազրույցի մեջ հիմնական խնդիրը հենց այն է, որ ասում է ռազմական հեղաշրջում պետք է արվի, որ գեներալիտետը, ուժային կառույցները պետք է անեն։ Հիմա հարց ենք տալիս,՝ 2023 թվականին ռազմական հեղաշրջում, գեներալիտետ բառերի վերաբերյալ հայտարարությունը դուք չեք դիտարկել հանցագործություն, ինչպե՞ս եղավ, որ հիմա հանցագործություն է»,-նկատեց փաստաբանը։

Նրա խոսքով՝ Քրեական դատավարության օրենսգրքով ու Սահմանադրությամբ արգելված է կրկնակի դատելը, իսկ դա այն չի, որ դատավճիռ պետք է լինի․« Խոսքն այն մասին է, որ պետությունը նույն արարքի հետ կապված նույն դրվագով գտնում է, որ անձի արարքում հանցագործություն չկա և քրեական հետապնդում չի հարուցում նրա նկատմամբ, և քանի այդ որոշումը ուժի մեջ է, չի կարող պետությունը նույն հանգամանքներով անձի նկատմամբ նորից վարույթ հարուցել։ Իրենք այս խախտումը արել են։ Դրա համար եմ ասում՝ սա ակնհայտ ապօրինի քրեական հետապնդում է»։

Ընդ որում, ինչպես ասաց փաստաբանը, այս հանգամանքը բացառում է նաեւ կալանքը, քանի որ կալանքի հետ կապված դատարանը պարտադիր պետք է ուշադրություն դարձնի այս հանգամանքի, թե արդյոք քրեական հետապնդումը բացառող հանգամանք կա թե չկա, իսկ սա ուղիղ բացառող է։

Երեմ Սարգսյանի պնդմամբ՝ Սրբազանի հայտարարություններն ազատ խոսք է, քննադատություն է, նա միշտ է խոսել է այդ մասին։