«Նման դրսեւորումների տրամաբանական հանգրվանը ավտորիտար կառավարումն է»․Հարությունյանը Դրմեյանին պաշտոնանկ անելու Փաշինյանի որոշման մասին
«Նման դրսեւորումների տրամաբանական հանգրվանը ավտորիտար կառավարումն է»․այսպիսի կարծիք է հայտնել «Իրավունքների պաշտպանություն առանց սահմանների» ՀԿ իրավական հարցերով փորձագետ Հասմիկ Հարությունյանն՝ անդրադառնալով Նիկոլ Փաշինյանի՝ միջազգային իրավական հարցերով ներկայացուցչի գրասենյակի ղեկավար Լիպարիտ Դրմեյանին պաշտոնանկ անելու որոշման մասին։
Սոցիալական ցանցում Հարությունյանը գրել է․«Նիկոլ Փաշինյանի որոշմամբ Լիպարիտ Դրմեյանն ազատվել է վարչապետի աշխատակազմի միջազգային իրավական հարցերով ներկայացուցչի գրասենյակի ղեկավարի պաշտոնից։
Ընդամենը երեկ վարչապետ Նիկոլ Փաշինյանը, արձագանքելով դիտարկմանը, թե Կառավարությունն ընդունել է, որ Ստոկհոլմի արբիտրաժի որոշումը ենթակա է պարտադիր կատարման, հայտարարել էր.
«Կառավարությունը ես եմ, եթե իմ դիրքորոշմանը հակասող կա, թող հենց հիմա դիմում գրի՝ գնա»։
Այսօր արդեն այն եզակի մնացած պաշտոնյաներից մեկը, ով համարձակվել էր օրենքի եւ ՀՀ ստանձնած պարտավորությունների մասին խոսել, այլեւս չի աշխատում։
Հակաժողովրդավարական այս հերթական քայլը խոսում է անձակենտրոն իշխանության, բազմակարծության ու փոխզիջումների բացակայության, ժողովրդավարական սկզբունքների կոպիտ ոտնահարման մասին։
Նման դրսեւորումների տրամաբանական հանգրվանը ավտորիտար կառավարումն է։ Հիշենք ԲԴԽ ղեկավարի եւ ուժային կառույցների ղեկավարների մեկ sms ով ազատումները։
Բոլոր նրանք, ովքեր հանդուրժում եւ տարբեր պատճառներով դեռ արդարացումներ են գտնում այս ամենին, նպաստում են ՀՀ-ում ավտորիտար կառավարման հաստատմանը։
Ցավալի է տեսնել միջազգային իրավական հարցերով գրասենյակի վերջնական թուլացումը, Եղիշե Կիրակոսյանի հիմա արդեն Լ. Դրմեյանի բացակայությունը իր հետքն է թողնելու այդ գրասենյակի աշխատանքում։
Վստահ եմ Կառավարությունում շատերը նույնիսկ չգիտեն այդ գրասենյակի կարեւոր դերի մասին»։
Հիշեցնենք, երեկ լրագրողների հետ ճեպազրույցի ժամանակ Փաշինյանը հայտարարել էր՝ «Կառավարությունում եթե կան մարդիկ իմ դիրքորոշմանը հակասող դիրքորոշում ունեն, հենց հիմա թող դիմում գրեն, շենքերից դուրս գան։ Եթե ոչ՝ ես ինքս նրանց կհանեմ»։
Փաշինյանն այս հայտարարությունն արել էր, երբ լրագրողները հետաքրքրվել էին՝ արդյոք կառավարությունը չի պատրաստվում կատարել Ստոկհոլմի արբիտրաժային ինստիտուտի որոշումը ՀԷՑ-ի վերաբերյալ, հատկապես որ իրավական հարցերով ՀՀ ներկայացուցիչն ասել է, որ միջազգային արբիտրաժի որոշումը պարտադիր է կատարման։
