Ղարիբ Բաբայանի գործողությունը՝ տեսանյութը հրապարակելը խոսքի ազատության շրջանակներում էր, դրա համար պատասխանատվության ենթարկելը ոչ իրավաչափ միջամտություն է․Մելիքյան

Ղարիբ Բաբայանի նկատմամաբ քրեական հետապնդումն, ըստ Աշոտ Մելիքյանի, դատապարտելի է, նրանք անթույլատրելի մոտեցում են ցուցաբերել սեփական անգործությունը քողարկելու նպատակով

Իրավապահների՝ Ղարիբ Բաբայանի կատարած գրառումը որպես  ատելության խոսքի տարածում որակելն անընդունելի է, այդ գնահատականի մեջ որևէ մասնագիտական մոտեցում և իրավական հիմնավորում չկա։ Այս մասին այսօր «Մեդիա կենտրոն»-ում հրավիրված «Խոսքի ազատությունը Հայաստանում. ի՞նչ է բացահայտում Ղարիբ Բաբայանի գործը»  քննարկման ժամանակ ասաց Խոսքի ազատության պաշտպանության կոմիտեի նախագահ Աշոտ Մելիքյանը։

Հիշեցնենք, Ստեփանակերտի «Մեսրոպ Մաշտոց» համալսարանի դասախոս, «Ռազմավարական հետազոտությունների անկախ կենտրոն» ՀԿ-ի ղեկավար Ղարիբ Բաբայանի նկատմամբ քրեական գործ է հարուցվել ատելություն, խտրականություն, անհանդուրժողականություն և թշնամանք հրահրելուն և քարոզելուն ուղղված հրապարակային խոսքի, ինչպես նաև այդ նպատակով նյութեր տարածելու դեպքով։ Ըստ իրավապահների՝ Ղարիբ Բաբայանը ՀՀ իշխանությունների և ՀՀ ոստիկանության ծառայողների նկատմամբ ատելություն, անհանդուրժողականություն և թշնամանք հրահրելուն ու քարոզելուն ուղղված նյութ և հրապարակային խոսք է ասել։

Ղարիբ Բաբայանը ձերբակալվել էր այն բանից հետո, երբ իր ղեկավարած «Ռազմավարական հետազոտությունների անկախ կենտրոն» ՀԿ-ի ֆեյսբուքյան էջով տարածել էր տեսանյութ, որտեց մի խումբ իրանցիների՝ ազգությամբ ադրբեջանցի, Երևանի կենտրոնում՝ Հանրապետության հրապարակում «ջան Ղարաբաղ» երգն էին երգում։

Քննչական կոմիտեն նրա նկատմամբ կալանքը որպես խափանման միջոց ընտրելու միջնորդություն էր ներկայացրել դատարան։ Դատարանը մերժեց միջնորդությունը։ Թեեւ Ղարիբ Բաբայանն ազատության մեջ է, սակայն նրա նկատմամբ իրականացվում է վարչական հսկողություն, եւ սահմանափակվել է հրապարակային խոսքով հանդես գալը:

Աշոտ Մելիքյանի կարծիքով՝ հրապարակված տեսանյութը հանրային նշանակություն ունեցող կարեւոր նյութ է․«Պատահական չէ, որ հարց էր բարձրացվում, թե ինչպես կարող է Երեւանի կենտրոնում նման խրախճանք տեղի ունենալ մի հարցի թեմայով, որ մեր ամբողջ ազգի համար ողբերգություն էր»:

Աշոտ Մելիքյան

Ըստ Մելիքյանի,  ԱԱԾ-ն պարտավոր էր զբաղվել այդ հարցով՝ պարզելու դեպքի մանրամասներն ու բուն պատճառները, նկատի ունենալով նաև այն հնարավոր վարկածը, որ այդ ամենը կազմակերպված և պատվիրված է եղել Ադրբեջանի կողմից։

«Ես կարծում եմ, որ ԱԱԾ-ն պետք է, որ բավականին ռեսուրսներ և հնարավորություններ ունենա, Հանրապետության հրապարակում 1-2 աչք ու ականջ ունենա, իմանալու համար, թե ի՞նչ է տեղի ունենում»,-հավելեց Մելիքյանը։

Նրա վստահեցմամբ՝ այդ նյութի տարածմամբ խոսքի ազատության խախտում չի եղել, խոսքի ազատության շրջանակների մեջ էր այդ գործողությունը հրապարակելը, և այդ հրապարակման համար պատասխանատվության ենթարկելը ոչ իրավաչափ միջամտություն է մարդու խոսքի ազատության իրավունքի նկատմամբ, և այսպիսի դեպքերը պետք է ուղղակի բացառել։

Քննարկման մեկ այլ մասնակից՝ իրավապաշտպան Զառա Հովհաննիսյանի կարծիքով էլ՝ խնդրի այսչափ մեծ հնչեղություն ձեռք բերելը առաջին հերթին իրավապահ մարմինների թերի աշխատանքի հետևանք է, ովքեր դեպքի պահին տեղում չեն եղել, իսկ հետագայում ևս հասարակությանը լիարժեք չեն ապահովել ինֆորմացիայով։

Իրավապաշտպանի խոսքով՝ Հանրապետության հրապարակի խոցելիությունը ուղիղ հարված է յուրաքանչյուր քաղաքացու, և պետք է մեծ ուշադրություն դարձվեր հնարավոր տեղեկատվական պատերազմին։

«Իրավապահ մարմինները պետք է ադեկվատ պատասխանեին և հանրային հաշվետվողականությամբ հանդես գային՝ ի՞նչ է տեղի ունեցել, որտեղի՞ց էին այդ մարդիկ, ինչո՞ւ է հատուկ տեսանկարահանվել այդ ամենը, և ո՞ր մեդիաալիքներում է առաջինը տարածվել։ Այս ամենով գոնե սպառիչ պատասխաններ կտրվեին հանրությանը»,-ասաց իրավապաշտպանը։

Անդրադառնալով իրավիճակի պատճառներին և հետևանքներին, պարոն Մելիքյանը նշեց, որ  հասարակության շրջանում գործի նման մեծ հնչեղություն ձեռք բերելը, ոչ միայն արդարությունը վերականգնելուն ուղղված  մարդկանց անկեղծ ցանկությունն էր, այլ նաև հարմար առիթ՝ ընդդիմադիր շրջանակների համար, խնդիրը քաղաքական նպատակներին ծառայեցնելու։

Նրա ներկայացմամբ՝մյուս կողմից՝ եթե  մի կողմ դնենք քաղաքական շահարկումներն ու մանիպուլիացիոն մեկնաբանությունները, և ղեկավարվենք միայն իրավունքով, ապա կտեսնենք, որ իրավապահ մարմինները դատապարտելի, նույնիսկ անթույլատրելի մոտեցում են ցուցաբերել սեփական անգործությունը քողարկելու նպատակով, կամ գործել են ոչ պրոֆեսիոնալ, իսկ այս ամենը բանախոսի խոսքով՝ «հասարակությանը լավ տեղ չի տանելու»։

Զառա Հովհաննիսյան

Զառա Հովհաննիսյանի կարծիքով՝ եթե քրեական հետապնդումը չդադարեցվի և չփոխվի խոսքի ազատության վերաբերյալ մոտեցումը, հասարակության շրջանում խնդիրները կլինեն անխուսափելի․

Ըստ նրա՝ հնարավոր հետևանքները ևս բազմաթիվ կլինեն՝ սկսած ներքաղաքական շահարկումներից, մինչև մատնանշում միջազգային հարթակներում․«Խնդիրը ինքնին հրատապ լուծման կարիք է զգում, և դեռևս ժամանակ կա, որպեսզի իրենք իրենց հաշիվ տան, և նման քրեական հետապնդումը ուղղակի դադարեցնեն, կալանքը չկիրառելու դեռ շատ քիչ է»։

 Նիկոլ Մարգարյան