«Վարդան Ղուկասյանն այս վիճակով քաղաքական գերի է ընկնում ՔՊ-ի և Մարտուն Գրիգորյանի՝ չհայտարարված միասնության ձեռքը»․Լևոն Բարսեղյան

Արդյոք առկա քրեական գործերը կարող են որպես գործիք կիրառվել Վարդան Ղուկասյանին «խաղից հանելու» համար, Լևոն Բարսեղյանն ասում է՝ Վարդան Ղուկասյանի ընտրական մղումները կապված են իր ուենցվածքը փրկելու հետ ու թեև  ասել է, որ չի հաշտվելու իշխանության հետ, բայց նա ցույց է տվել, որ շատ հեզ, ճկվող անձնավորություն է, պետք լինի՝ սատանու հետ էլ գործարքի կգնա

«Մեր քաղաքը» դաշինքը վերջապես հայտարարեց, որ անհրաժեշտ քվեն կտա Վարդան Ղուկասյանին։ Եթե ավագանու նիստ գումարվի ու Գրիգորյանի խմբակցությունն իսկապես քվե տա, ապա Վարդան Ղուկասյանն, ըստ էության, կընտրվի Գյումրու քաղաքապետ։ Ղուկասյանին քվե են տալու նաև «Մայր Հայաստան» և «Իմ հզոր համայնք» կուսակցությունները։

Հիշեցնենք, Գյումրու ավագանու ընտրությունների արդյունքներով ավագանիում «Քաղաքացիական պայմանագիրը» 14 մանդատ կունենա, Կոմկուսը՝ Վարդան Ղուկասյանի գլխավորությամբ՝ 8 մանդատ, Մարտուն Գրիգորյանի գլխավորած «Մեր քաղաքը»՝  6 մանդատ,  Ռուբեն Մխիթարյանի գլխավորած «Իմ հզոր համայնքը»՝ 3, «Մայր Հայաստանը» Կարեն Սիմոնյանի գլխավորությամբ՝ 2 մանդատ: Մեծամասնություն կազմելու համար անհրաժեշտ է ունենալ 17 մանդատ:

Թեև Մարտուն Գրիգորյանը հայտարարել է, որ «Մեր քաղաքը›› դաշինքը կտա անհրաժեշտ քանակությամբ քվե՝ մյուս երկու ուժերի կողմից սատարվող թեկնածու Վարդան Ղուկասյանին՝ առանց որևէ պաշտոնի, ակնկալիքի և որևէ պայմանավորվածության», Լևոն Բարսեղյանը չի կարծում, թե Մարտուն Գրիգորյանն ամբողջությամբ համախոհ է  դարձել Վարդան Ղուկասյանի հետ։

«Ընդամենը երկու քվե է տալու»,-REGIONSTV-ի հետ զրույցում ասում է «Եվրաքվե» դաշինքով  Գյումրու ավագանու ընտրություններին մասնակցած, սակայն շեմը չիհաղթահարած Լևոն Բարսեղյանը։

Մարտուն Գրիգորյանն իր հայտարարության մեջ ասել է․« Հետագա ամբողջ պատասխանատվությունը՝ քաղաքի հետագա ճակատագիրը՝ ՔՊ-ին տալու, չտալու մասով, այսուհետ թեև վերցնում են իրենց վրա երեք ուժերը՝ Վարդան Ղուկասյանի գլխավորությամբ»։

Այս առնչությամբ Լևոն Բարսեղյանն ասում է՝ Մարտուն Գրիգորյանն ուզի, թե չուզի,  Վարդանն Ղուկասյանի քաղաքապետ դառնալու, քաղաքապետի գործունեության պատասխանավությունը հավասարպես, նույնիսկ մյուս ուժերից առավել ինքն է ստանձնում․«Կապ չունի՝ կոալիցիա կկազմի, չի կազմի, պաշտոն կվերցնի, թե՝ ոչ։ Պատասխանտվություն է ստանձնում բոլոր այն լավ բաների, բոլոր այն վատ բաների համար, որը տեղի կունենա Վարդան Ղուկասյանի կառավարման արդյունքում»։

Այդուհանդերձ, ըստ Բարսեղյանի, Մարտուն Գրիգորյանի վեց հոգանոց խմբակցութունը կարող է «եղանակ ստեղծել» ավագանիում՝  կարևորագույն որոշումներ են լինելու՝  քաղաքի հնգամյա զարգացման ծրագիր, բյուջե, հաստիքացուցակ, տեղական տուրքերի դրույքաչափեր և այլն․«Իր  խմբակցությամբ կարող է կանոններ թելադրել, եթե ՔՊ-ն էլ թելադրի, ապա ստացվում է 20 հոգով կարող են 13 հոգուն թելադրել՝ այս խնդիրն այսպես պետք է լուծվի և այլն»։

Լևոն Բարսեղյանի կարծիքով՝ այնպես չէ, որ Վարդան Ղուկասյանը եթե ընտրվի քաղաքապետ, հեշտ ու հանգիստ կառավարելու է․«Վարդան Ղուկասյանն այս վիճակով քաղաքական գերի է ընկնում ՔՊ-ի և Մարտուն Գրիգորյանի՝ չհայտարարված միասնության ձեռքը։ Եթե Գրիգորյանը երկու քվե է տալու, ապա Վարդան Ղուկասյանը հարաբերական մեծամասնությամբ է ընտրվելու, ոչ թե բացարձակ մեծամասնությամբ։ Այսինքն, տասնհինգ քվեով հարաբերական մեծամասնությամբ կդառնա քաղաքապետ, դա թույլ դիրք է, դրանով ննրան կհասկացնի, որ  դու ես մեր ձեռքում։ Ընդ որում, դատելով Մարտուն Գրիգորյանի հայտարարությունից, նա չի ասել, որ իրենց խմբակցությունը միշտ կողմ է քվեարկելու»։

Հաշվի առնելով այն քրեական գործերը, որոնք առնչվում են Վարդան Ղուկասյանին, ապա նա, ինչպես նշում է Բարսեղյանը, բավականին խոցելի, թույլ կերպար է՝ մի քանի հանգամանքների բերումով։

«Ինքն անընդհատ նյարդային լարումների մեջ է լինելու իր ապօրինի գույքի բռնագաձման գործով (Դատախազությունը 17 անշարժ գույք ու 224 միլիոն դրամ է պահանջում Վարդան Ղուկասյանից, նրա կնոջից, որդուց ու դուստրից, հեղ․)։ Այս առումով ինքը ոչինչ չի արել հաշտվելու համար, ինքը, թեև ասել է, թե չի հաշտվելու իշխանության հետ, բայց  ժամանակի ընթացքում ցույց է տվել, որ շատ հեզ, ճկվող անձնավորություն է, պետք եղած ժամանակ ՀՀԿ-ի,  սատանու, նույնիսկ Պուտինի հետ էլ կարա գործարքի գնալ։ Հիշում ենք, ասում էր՝ «ես ստիպված դարձա ՀՀԿ անդամ», էն որ կանչում էր՝ «քայլ արա, մերժիր Սերժին»։ Ապօրինի գույքի վերադարձի մասով չեմ կարծում, որ որևէ շանս ունի փրկել դրանք։  Հետաքրքիր է՝ նույնիսկ Գագիկ Խաչատրյանն է ուզում փրկել իր գույքը, ինքը չի ուզում։ Իրականում Վարդան Ղուկասյանի այս քաղաքական մղումները զգալիորեն կապված են իր ուենցվածքը փրկելու հետ»,-ասում է Լևոն Բարսեղյանը։

Կկրկնվի արդյոք Վանաձորի պատմությունը՝ քրեական գործերով իշխանությունը ճնշի, ինչպես եղավ Մամիկոն Ասլանյանի դեպքում, կալանավորի, ու գուցե Վարդան Ղուկասյանի թիմը հրաժարվի իշխանությունից։

Լևոն Բարսեղյանը հիշեցնում է Վարդան Ղուկասյանին առնչվող այլ քրեական գործերը՝ իր պաշտոնավարման ընթացքում պաշտոնական դիրքի չարաշահումների և  փողերի լվացման գործերը, նաև այս ընտրությունների ժամանակ Ղուկասյանին վերագրվող հայտնի ձայնագրության դեպքը, որի առնչությամբ քրեական վարույթ է նախաձեռնվել ՔՕ-ի 236 հոդվածի հատկանիշներով՝ հավաքին մասնակցելուն հարկադրելը, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու հոդվածի հատկանիշներով:

Նշված հոդվածով  նախատեսում է 1-ից մինչև 3 տարվա ազատազրկում կամ տուգանք, ինչպես նաև որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկում` 2-ից հինգ տարի ժամկետով:

Բարսեղյանը նկատում է՝ եթե այս գործնն առաջ գնա, ու դատարանը վճիռ կայացնի՝ Վարդան Ղուկասյանը պաշտոնանկ պետք է լինի․«Իսկապես, կարող է ստացվի մի դրություն, որ իշխանությունը որոշի «խաղից  հեռացնել, իշխանությունից հեռացնել Վարդան Ղուկասյանին՝  ավագանուն թույլ տալով, որ քաղաքապետ ընտրի մեկ  ուրիշին ավագանու կազմից։ Իհարկե, կարող է այս դեպքում Մարտուն Գրիգորյանի դիրքորոշումն էլ փոխվի։ Ավելի վատ տարբերակ կլինի, եթե ՔՊ-ն  որոշի բոյկոտել նիստերը»։

Ընդ որում, դեռ չի հայտարարվել, թե օրինակ Մարտուն Գրիգորյանը մնալո՞ւ է ավագանիում, թե՞ մնալու է պատգամավոր, որովհետև եթե չմտնի ավագանի, ապա քաղաքապետ ընտրվելու թեկուզ փոքր հննարավորությունը կորցնելու է։

Լևոն Բարսեղյանը չի կարծում թե ՔՊ-ին կհաջողվի ընդդիմադիր խմբակցություններից մի քանի քվե «պոկել», որպեսզի իրենց թեկնածուի օգտին քվեարկեն, այնպես, ինչպես եղավ Ախուրյան ու Ալավերդի համայնքներում։

«Բարդ կլինի երեք քվե «պոկել»,  ընդդիմության ցուցակներն ահագին տքնաջանորեն են կազմվել և նրանք հավատարիմ են իրենց առաջնորդներին։ Իսկական քաղաքաական պայքարը կարող է լինել,  որ ՔՊ-ն ավագանիում 14 անդամներով որակյալ կազմ ունենա, դա լուրջ ազդեցություն կարող է ունենալ»,-ասում է Բարսեղյանը։

Նրա կարծիքով՝ Վարդան Ղուկասյանը եթե ընտրվի քաղաքապետ, ապա չի կարողանալու անել այն, ինչ արել է իր կառավարման տարիներին, նախորդ համակարգը չէ հիմա, և նա չի կարող մի քանի տասնյակ միլիոն դրամանաց արձանների գնում կատարել, ապօրինի գույք կուտակել․«300-400 հազար դրամ աշխատավարձին է մնալու։ Իրեն թվում  է, թե իր ժամանակնեը վերադառնալու են»։

Ինչ վերաբերում է ՔՊ-ականների՝ Մարտուն Գրիգորյանի որոշման մասին այսօրվա հայտարարությունները, թե՝ տեսաք, գյումրեցիներ, մենք զգուշացնում էինք ձեզ և այլն, ապա Լևոն Բարսեղյանն ասում է՝  մեղադրում են մեղադրոմ գյումրեցուն, մինչդեռ գյումրեցին այս տարիների ընթացքում չտեսավ, որ ՔՊ-ն արդարություն է հաստատում, բանտերում լինելիք մարդիկ բանտերում չհայտնվեցին․«Իսկ եթե քաղաքական գնահատական եք տալիս պետության զավթման համար, դրանից բխում են գործողություններ՝ անցումային արդարադատություն, վեթինգ, լյուստրացիա,  դրանով բացահայտում եք, որ  այս, այս, այս մարդիկ կամ մարդը պետությանը վննաս է տվել, օրենքով ընդունվում՝  այս ինչ անձն  իրավունք չունի մասնակցելու տեղական կամ համապետական ընտրութուններին այսքան ժամանակով,  համայնքային կամ պետական բյուջեից  ֆինանսավորվող հիմնարկում աշխատելու իրավունք չունի և այլն։ Ես հույս ունեմ, որ գոնե այսօր ՔՊ-ն մտածում է, թե ինչու այս օրն ընկավ, մտածում, թե ինչեր պետք է աներ այս յոթ տարվա ընթացքում, բայց չի արել»։