«Ցուլիկի միս չեն կռնա ուտե, գյուղացիների ու ղասաբների միսը գուզեն ուտե՞ն»․ բողոքի ակցիա Գյումրիում
Եռօրյա ընդմիջումից հետո Շիրակի մարզի մսավաճառներն ու անասնապահներն այսօր բողոքի ակցիա էին իրականացնում մարզպետարանի շենքի դիմաց։ Նրանք գրավոր դիմել են Շիրակի մարզպետին, հայտնել, որ չտուգանեն, թույլատրեն իրենց միս վաճառել, մինչև որ մարզում սպանդանոց գործի։
Շիրակի մարզում պատրաստի 3 սպանդանոց կա, բայց ոչ մեկն էլ չի գործում։ Անասունների մորթ չի կատարվում, քանի որ գյուղացիները չեն կարողանում իրենց անասունները հարևան մարզերի սպանդանոցներ հասցնել։ Ճանապարհածախսը թանկ է, մի քանի հարյուր կիլոգրամանոց կենդանուն մեքենայի թափք հանել հնարավոր չէ։ Սպանդանոցների բացակայությունը մսավաճառների համար էլ է լուրջ խնդիր ստեղծել։ Արմավիրի, Թալինի ու Վանաձորի սպանդանոցներից միս բերել չեն կարող, քանի որ չկա։ Ասում են՝ Արմավիրի սպանդանոցից միս են պատվիրում, 4 օր հետո է տեղ հասնում։
Սպանդանոցային մորթի կազմակերպման ու մսի վաճառքի շղթան Շիրակի մարզում այդպես էլ չձևավորվեց, բայց կառավարության որոշումը կիրառում են, մսավաճառներին տուգանում ու միսը առգրավում են։
Այսօր էլ բողոքողների հանդիպումը Շիրակի մարզպետի հետ չկայացավ։ Մարզպետ Դավիթ Առուշանյանը Երևանում էր, խոստացել է փետրվարի 7-ին ընդունել մսավաճառներին ու անասնատերերին։
Իսկ 3 օր առաջ մսավաճառների հետ հանդիպել էին Շիրակի մարզպետի տեղակալ Արտուշ Հովհաննիսյանը և մարզպետի աշխատակազմի գյուղատնտեսության վարչության պետ Ռոման Համայակյանը։ Մսավաճառներին խորհուրդ էին տվել միավորվել ու մոդուլային փոքր սպանդանոց հիմնել։ Ըստ Համայակյանի, պետությունը լիզինգի միջոցով, տարեկան 2-3 տոկոս տոկոսադրույքով, 5 տարի ժամկետով վարկ է տրամադրում այդ նպատակի համար։
Բայց մսավաճառների սպասած արդյունքը սա չէ, իշխանության հանդեպ վստահություն չունեն, չեն ուզում նորից վարկերի բեռի տակ մտնել՝ երաշխիք չունենալով, որ սպանդանոցային բիզնեսը կաշխատի։
Տեսանյութը՝ առանց մեկնաբանության։
