ՀՀԿ-ն չի կարող ազդել Մարտուն Գրիգորյանի որոշման վրա․Աբրահամյան
Տիգրան Աբրահամյանը վստահեցնում է, որ Մարտուն Գրիգորյանը ՀՀԿ-ի հետ չի քննարկել Գյումրու ընտրություններին մասնակցելու իր որոշումը
ՀՀԿ-ն չի կարող իրեն իրավունք վերապահել ուղղորդելու Մարտուն Գրիգորյանին։ Այս մասին այսօր հրավիրված ասուլիսում հայտարարեց ԱԺ «Պատիվ ունեմ» խմբակցության պատգամավոր Տիգրան Աբրահամյանը։ Նա նաև հիշեցրեց՝ Մարտուն Գրիգորյանը չի եղել եւ չի հանդիսանում ՀՀԿ անդամ, Մարտուն Գրիգորյանը «Պատիվ ունեմ» դաշինքով պատգամավոր է դարձել «Հայրենիք» կուսակցության քվոտայով։
Արդեն քանի օր է՝ հանրությունը սպասում է Մարտու Գրիգորյանի որոշմանը՝ արդյոք նա կմիանա Գյումրու արտահերթ ընտրություններում շեմը հաղթահարած Վարդան Ղուկասյանին և նրան կընտրի որպես Գյումրու քաղաքապետ։
Այս ընթացքում սոցիալական ցանցերում և լրատվամիջոցներում չեն դադարում քննադատություններն ու մեղադրանքները, թե «Վարդան Ղուկասյանը «քոչարյանական է, Մարտուն Գրիգորյանը՝ Սերժի թիմից է։ Այս ուժերի հարաբերությունները լարված են, Գյումրիում չեն միանա» և այլն։
Մարտուն Գրիգորյանն օրերս հայտարարել է՝« ՔՊ-ն Գյումրիում քաղաքապետ չի ունենալու` դա հաստատ է»։
«Մենք չենք ցանկանում անել քայլեր, որոնք Մարտուն Գրիգորյանին խոցելի կդարձնեն։ Ինքը, իր ընտանիքը հստակ կեցվածք ունեն, դեռ ժամանակ կա, Մարտուն Գրիգորյանը կհայտարարի իր դիրքորոշումը, որը, վստահաբար, չի վնասի Հայաստանին, հայկական պետականությանը»,-ասաց Տիգրան Աբրահամյանը։
Նա նշեց, որ Մարտուն Գրիգորյանը ՀՀԿ-ի հետ չի քննարկել Գյումրու ընտրություններին մասնակցելու իր որոշումը, դա իր եւ իր ընտանիքի որոշումն է եղել, ուստի ՀՀԿ-ն չի կարող ազդել նրա որոշման վրա։
Աբրահամյանը վստահեցրեց՝ ՀՀԿ-ի կարծիքը Մարտուն Գրիգորյանին փոխանցել են, սակայն այն չի կարող հանրայնացնել, որպեսզի դա չդիտարկվի իբրեւ նրա վրա ճնշում, երրորդ ուժի կողմից միջամտություն։
Մարտուն Գրիգորյանն, ըստ Աբրահամյանի, վերջին օրերին շատ է թիրախավորվել, այդ թեման նաև օգտագործվել է ՀՀԿ-ին եւ Սերժ Սարգսյանին թիրախավորելու համար․ «Բայց մենք վաղուց ունենք իմունիտետ եւ որտեղ անհրաժեշտ է՝ պատասխանը վերադարձնում ենք համարժեք, երբեմն՝ ոչ այդքան համարժեք»։
Աբրահամյանն անդրադառնալով հետընտրական տրամադրություններին և խոսույթին, ասաց, որ տպավորություն է ստեղծվում, թե որոշ ուժերի համար ձեռնտու է ոչ թե որ համապատասխան ձայները տրվեն Վարդան Ղուկասյանին, որպեսզի նա դառնա քաղաքապետ, այլ չտրվեն այդ ձայները, որպեսզի Մարտուն Գրիգորյանը, ՀՀԿ-ն թիրախավորվեն։ Սա արվում է, ըստ Աբրահամյանի, 2026 թվականի ընտրություններում ՀՀԿ-ի վրա ազդելու համար․«ՀՀԿ-ն պատրաստ է ցանկացած պայքարի, ցանկացած բախման՝ ամենակոշտին էլ եւ մենք թույլ չենք տա, որ ՀՀԿ-ի կենսագրությունը ստվերվի։ ՀՀԿ-ն տարբեր փուլերում ունեցել է սխալներ, բայց հիմա հարցն օբյեկտիվ իրականությունն է։ Տպավորություն է, որ շատ ուժերի խնդիրը ոչ թե Նիկոլ Փաշինյանն է, այլ՝ ՀՀԿ-ն»։
Հիշեցնենք, որ Մարտուն Գրիգորյանի՝ Վարդան Ղուկասյանին միանալու կամ չմիանալու որոշումը Գյումրիում, քաղաքական դաշտում պայմանավորում են նրանց միջև վաղեմի թշնամանքով՝ սկսված դեռ 2008-ից, երբ Գրիգորյանը Գյումրու քաղաքապետի ընտրությունններում իր թեկնածությունն առաջադրեց: Վարդան Ղուկասյանի և Մարտուն Գրիգորյանի կողմնակիցների միջև պարբերաբար միջադեպեր էին լինում, այդ թվում՝ կրակոցներով։ 2013-ին հերթական միջադեպի, փոխհրաձգության ժամանակ Վարդան Ղուկասյանի եղբոր որդին՝ Վահե Ղուկասյանը սպանել է Մարտուն Գրիգորյանի թիմակիցներից Շեկո մականվամբ Արտյոմ Կարապետյանին։
