Խստացվում են զինվորական ծառայությունից խուսափելու համար նախատեսվող պատիժները
Զինվորական ծառայությունից խուսափելու համար նախատեսվում է սահմանել ազատազրկում 3-ից 6 տարի ազատազրկում
Խստացվում են զինվորական ծառայությունից խուսափելու համար նախատեսվող պատիժները։ Այս մասին որոշումն ընդունվել է կառավարության այսօրվա նիստում։
Կառավարությանը հավանությանը ներկայացրած նախագծի հեղինակ արդարադատության նախարարությունն առաջարկում է պարտադիր զինվորական կամ այլընտրանքային ծառայությունից կամ զորահավաքային զորակոչից խուսափելու համար պատիժ սահմանել ազատազրկում 3-ից 6 տարի՝ այժմ գորոծղ 2-ից 5 տարվա փոխարեն։
Վարժական հավաքից խուսափելու համար թե նախկինում սահմանվում էր պատիժ տուգանքի ձևով առավելագույնը քսանապատիկի չափով, կամ կարճաժամկետ ազատազրկում՝ առավելագույնը երկու ամիս ժամկետով, կամ ազատազրկում՝ առավելագույնը երկու տարի ժամկետով, ապա նախագծով առաջարկվում է տուգանք սահմանել տասնհինգապատիկից երեսնապատիկի չափով, կամ կարճաժամկետ ազատազրկում՝ առավելագույնը երկու ամիս ժամկետով, կամ ազատազրկում՝ 1-ից 3 տարի ժամկետով: Ըստ այդմ՝ փոփոխություններ են նախատեսվում ՀՀ քրեական օրենսգրքի 461-րդ 462-րդ հոդվածներում։
Կառավարությունը հիմնավորման մեջ նշում է, որ այս խստացումները զորակոչից և վարժական հավաքներից խուսափելու դեպքերը նվազեցնելու նպատակ ունեն։
Նախագծի հմնավորման մեջ նաև նշված է, որ 2023 թվականի ընթացքում ՀՀ քրեական օրենսգրքի 461-րդ և 462-րդ հոդվածներով նախաձեռնվել է ընդհանուր 1499 քրեական վարույթ, իսկ 2024 թվականի ընթացքում՝ ընդհանուր 1779 քրեական վարույթ։
Նշենք, որ նախագիծը պետք է քննարկվի նաև ԱԺ-ում։
