Ընտանիքում բռնություն գործադրած անձը կհսկվի էլեկտրոնային միջոցներով, որպեսզի չմոտենա զոհի տանը
Ընտանիքում բռնություն գործադրած անձի նկատմամբ կկիրառվի էլեկտրոնային հսկողություն, որպեսզի նա չկարողանա մոտենալ բռնության զոհի տանը։
Այս մասին որոշումը հաստատվեց կառավարության այսօրվա նիստում։
Գործադիրը հավանություն տվեց «Ընտանեկան և կենցաղային բռնության կանխարգելման ու ընտանեկան և կենցաղային բռնության ենթարկված անձանց պաշտպանության մասին» օրենքում փոփոխությունների նախագծին։
Հիմնավորման մեջ նշված է, որ «Ընտանեկան և կենցաղային բռնության կանխարգելման ու ընտանեկան և կենցաղային բռնության ենթարկված անձանց պաշտպանության մասին» օրենքի 7-րդ հոդվածի 1-ին մասի համաձայն՝ եթե ընտանիքի մեկ անդամը, զուգընկերը, ընտանիքի նախկին անդամը կամ նախկին զուգընկերը մյուսի նկատմամբ բռնություն է կիրառել, և առկա է հիմնավոր ենթադրություն բռնության կրկնման կամ շարունակման անմիջականորեն սպառնացող վտանգի մասին, ապա ընտանիքի մյուս անդամի, զուգընկերոջ, ընտանիքի նախկին անդամի կամ նախկին զուգընկերոջ կյանքի և առողջության ապահովման նպատակով ոստիկանության իրավասու ծառայողն անհապաղ կայացնում է անհետաձգելի միջամտության որոշում: Անհետաձգելի միջամտության որոշում կարող է կայացվել նաև այն դեպքում, երբ նախազգուշացում ստանալուց հետո՝ մեկ տարվա ընթացքում, անձը կատարել է այնպիսի բռնի արարք, որը չի պարունակում հանցակազմի հատկանիշներ:
Այս միջամտության նպատակն է արգելել բռնարարին որոշակի ժամանակով մոտենալ զոհին կամ ընտանիքի անդամներին։
Եվ որպեսզի ոստիկանության՝ բռնարարի նկատմամբ հսկողությունն առավել արդյունավետ իրականացվի, ինչպես նշված է հիմնավորման մեջ, առաջարկվում է իրականացնել էլեկտրոնային հսկողություն։
Նշված է, որ ուսումնասիրվել է միջազգային փորձն այս ոլորտում, պարզվել է, որ մի շարք երկրներում գործում է էլեկտրոնային (GPS տեղորոշման համակարգով) հսկողության միջոցների (բրասլետների, ձեռնաշղթաների) կիրառման պրակտիկան:
Համապատասխան օրենքում լրացում է կատարվել, որը նախատեսում է, որ ընտանիքում բռնություն գործադրած անձի նկատմամբ հնարավոր է լինելու կիրառել էլեկտրոնային հսկողության միջոցներ։ Պատասխանատվություն է սահմանվում էլեկտրոնային հսկողության միջոց կրելուց խուսափելու կամ հրաժարվելու դեպքում։
Օրենսդրական այս փոփոխություններն ուժի մեջ կմտնեն 2026 թվականի մարտի 1-ից։
