«ԵՄ-ն ու ՀՀ-ն երբեք այնքան մերձ չեն եղել, որքան հիմա։ Ես այստեղ եմ հստակ ուղերձով»․Կալաս
Արարատ Միրզոյանը և Կայա Կալասը համաձայնագիր են ստորագրել՝ «Հայաստանի և ԵՄ-ի միջև Եվրոպական միության ճգնաժամային կառավարման գործողություններում Հայաստանի մասնակցության շրջանակը սահմանելու մասին»:
«Հայաստանն ու Եվրամիությունը հաջողությամբ ավարտել են գործընկերության նոր օրակարգի շուրջ բանակցությունները»,-այս մասին այսօր Երևանում Եվրամիության արտաքին և անվտանգության քաղաքական հարցերով բարձր ներկայացուցիչ Կայա Կալասի հետ հանդիպումից հետո տեղի ունեցած ասուլիսում ասաց ՀՀ ԱԳ նախարար Արարատ Միրզոյանը։
«Սա հավակնոտ փաստաթուղթ է, որը համագործակցության նոր ուղղություններով է համալրելու և առավել խորացնելու է Հայաստան-Եվրամիություն երկկողմ օրակարգը՝ միաժամանակ խթանելով Հայաստանի և Եվրամիության միջև Համապարփակ և ընդլայնված գործընկերության համաձայնագրի արդյունավետ կիրարկումը»,- նշեց Միրզոյանը։
Նրա խոսքով՝ սա Հայաստան-Եվրամիություն գործընկերության օրակարգի ընդլայնման երկուստեք արտահայտված պատրաստակամության վառ օրինակ է, որը միաժամանակ ի ցույց է դնում գլոբալ անվտանգության, աշխարհում կայունության և խաղաղության հաստատման գործում կառուցողական ներդրում ունենալու Հայաստանի պատրաստակամությունը։
«Ես այստեղ եմ հստակ ուղերձով։ ԵՄ-ն ու ՀՀ-ն երբեք այնքան մերձ չեն եղել, որքան հիմա։ Վերջին տարիներին դուք իրականացրել եք օրենսդրություն ԵՄ անդամակցության գործընթացի մեկնարկի վերաբերյալ, և մենք պատրաստ ենք խորացնելու մեր գործընկերությունը։ Այսօր հայճույքով հայտարարում եմ բանակցող կողմերի միջև քաղաքական համաձայնության մասին՝ գործընկերության օարկարգի շուրջ, որը սահմանում է մեր առաջնահերթությունները տնտեսության զարգացման, անվտանգության և դիմակայունության ոլորտներում։ ԵՄ-ն այս առումով տրամադրում է 270 միլիոն եվրո՝ 2024-2027 թվականների համար։ Սա նախատեսում է աջակցություն բիզնեսներին, բարելավել փոխկապակցվածությունը ՀՀ-ի և ԵՄ միջև և նպաստում է բարեփոխումների ջանքերին։ Մենք նաև տրամադրում ենք բնակարանաշինության և սոցիալ-հոգեբանական աջակցություն տեղահանված անձանց համար»,-ասուլիսում հայտարարեց ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը։
Նա նաև հայտնեց, որ ԵՄ-ն ընդունել է վիզաների ազատականցման երկխոսությունը․«Եվրոպական հանձնաժողովն ընդունել է մուտքի աևտոնագրերի ազատականացման գործողությունների ծրագրի առաջարկը, և երբ պայմանները կատարվեն, գործընթացն ավարտին հասցվի, այն ավելի մոտ կդարձնի ԵՄ-ն ու ՀՀ-ն»։
Կալասը նշեց՝ ԵՄ-ն խորացնում է համագործակցությունը խաղաղության և կայունության համար․«ՀՀ-ում ԵՄ դիտորդական առաքելությունն այս առումով առանցքային դեր է կատարում»։
