«Երկրում կադրային ճգնաժամ է։ Լավ կադրերը չեն գա կառավարությունում աշխատեն, 400-500 հազար դրամ ստանան, ամեն կոպեկի հետ էլ անեծքը տանեն տուն»․Փաշինյան
Վարչապետ Նիկոլ Փաշինյանն ասում է՝ կառավարությունը սխալ կադրային քաղաքականություն է վարում, որովհետև երկրում կադրային ճգնաժամ է, մարդկային ռեսուրսի ճգնաժամ է
«7 տարվա մեջ, ով վեր է կենում, առավոտից իրիկուն ասում է՝ այս կառավարությունը սխալ կադրային քաղաքականություն է վարում: Կառավարությունը սխալ կադրային քաղաքականություն է վարում, որովհետև երկրում կադրային ճգնաժամ է,մարդկային ռեսուրսի ճգնաժամ է»,-այս մասին, այսօր կառավարության նիստում հայտարարեց վարչապետ Նիկոլ Փաշինյանը:
«Իսկ գիտեք ինչո՞ւ է ճգնաժամ, որովհետև մի երկրում, որտեղ բնակավայրերի 70 և ավել տոկոսում մանկապարտեզ չկա, երբ դպրոցների 70 տոկոսը և ավելին կիսաավերված է՝ ֆիզիկական և բովանդակային առումով, չի կարող այդտեղ չլինել կադրային սով։ Հիմա կասեն՝ ինչ է, չորացե՞լ է մեր երկրի արգանդը։ Չէ, չի չորացել, ժողովուրդ ջան։ Կան լավ կադրեր, փոքր խումբ, որոնք 1, 2, 3, 4, 5, 6, 7, 8, 9, 10 միլոին դրամով աշխատում են Հայաստանում՝ Հայաստանից դուրս։ Չեն գա աշխատեն Հայաստանի կառավարությունում, հլը մի բան չի, 400-500 հազար դրամ ստանան, ամեն ստացած կոպեկի հետ էլ անեծքը տանեն տուն՝ էլի պարգևավճար, էլի պարգևավճար, մեր բաները տարան, պարգևավճարը վճարեցին։ Ինչի պետք է գա կառավարությունում աշխատի»,-ասաց Փաշինյանը։
