«Այդ մտքերը որպես նախապայմաններ չեմ դիտարկում, կարծում եմ՝ կառավարությունն էլ չի դիտարկում»․նախարարը Ալիևի հայտարարության մասին
Հայաստանը պատրաստ է կնքել «Խաղաղության պայմանագիրը»։ Այս մասին այսօր կառավարության նիստից հետո լրագրողների հետ ճեպազրույցում ասել է Արդարադատության նախարար Սրբուհի Գալյանն՝ անդրադարռնալով Ադրբեջանի նախագահ Իլհամ Ալիեւի հայտարարություններին։
«Ընդ որում, ես այդ հնչեցված մտքերը որպես նախապայմաններ չեմ դիտարկում եւ կարծում եմ, որ կառավարությունն էլ չի դիտարկում։ Կառավարությունը պատրաստ է կնքել խաղաղության պայմանագիրը։ Ես իմ խոսքում նշել եմ, որ խաղաղությունն այլընտրանք չունի, եւ, այո, մեր գործողությունները պետք է միտված լինեն խաղաղության վերջնական հաստատմանը։ Բայց, թե ինչ կոնցեպտով պետք է առաջ շարժվենք դեպի խաղաղության պայմանագրի կնքումը, կարծում եմ, շատ շուտով հանրությանը հայտնի կլինի»,- ասել է նախարարը։
Հիշեցնենք, Բաքվում Գերմանիայի նախագահի հետ հանդիպման ժամանակ Ադրբեջանի նախագահն ասել էր․ «Եթե Հայաստանն ընդունի մեր երկու պայմանները, խաղաղության պայմանագրի ստորագրման խոչընդոտները կվերանան։ Մեր առաջին պայմանը ԵԱՀԿ Մինսկի խմբի լուծարման անհրաժեշտությունն է։ Երկրորդը կապված է Հայաստանի Սահմանադրության հետ»։
Նախարարը նաև ասաց՝ աշխատում ենք Սահմանադրության նոր տեքստի վրա․« Այս պահին տեքստի մասով մանրամասներ ասել չեմ կարող, բայց շատ կարեւոր է մի շեշտադրում, որ այդ տեքստը չի լինելու ու ի բնե չի կարող լինել գաղտնի եւ ինչ-որ պահի հանրայնացվելու է, եւ յուրաքանչյուր նորմ քննարկվելու է մեր հասարակության հետ»։
Հնարավո՞ր է իշխանությունն արագացնի Սահմանադրության փոփոխությունները, Գալյանն այս առնչությամբ ասաց՝ եթե խոսքը նոր Սահմանադրության մասին է, դա պարզ առաջադրանք չէ, որը կարելի է կատարել 1-3 ամիսների ընթացքում․«Խոսքը 8-10 ամիս ժամկետի մասին է, եւ չեմ կարծում, որ նոր Սահմանադրության տեքստ հնարավոր է այդ ժամկետից ավելի շուտ ունենալ»։
