Ալիևի որդին մեղադրվում է Բարվիխայում գտնվող հսկայական առանձնատան համար հարկեր չվճարելու համար․տունը գնահատվում է մոտ 3 միլիարդ ռուբլի
Ադրբեջանի նախագահ Իլհամ Ալիևի որդին՝ 27-ամյա Հեյդար Ալիևը, մեղադրվում է Մոսկվայի մարզի Բարվիխա քաղաքում գտնվող առանձնատան հարկերը չվճարելու համար։
Ռուսական լրատվամիջոցները գրում են, որ վիճելի անշարժ գույքը գտնվում է «Մայենդորֆյան այգիներ» էլիտար ամառանոցային ավանում։ Դրա մակերեսը կազմում է 1,6 հազար քառակուսի մետր, մոտավոր արժեքը՝ 35 միլիոն դոլար կամ 2,7 միլիարդ ռուբլի։
Նշվում է, որ «Ադրբեջանի առաջնորդի ժառանգորդը Ռուսաստանի Դաշնային հարկային ծառայությանը պարտք է գրեթե 1 միլիոն 946 հազար ռուբլի»։
Մոսկվայի մարզի Դաշնային հարկային ծառայության աշխատակիցներն արդեն մի քանի անգամ դիմել են դատարան և ստացել են գանձման կարգադրություն։ Ինչպես նշվում է հրապարակման մեջ, Դաշնային դատական կատարածուների ծառայության կայքում Հեյդար Ալիևի ծննդյան ամսաթիվը նշված է մեկ օրվա սխալով, ուստի նրա պարտքերը գտնելը կարող է դժվար լինել։
Վերջին շրջանում Ռուսաստանի և Ադրբեջանի միջև հարաբերությունները վատթարացել են։
Ադրբեջանական սփյուռքի ներկայացուցիչների ձերբակալությունը՝ 2000-ականներին Եկատերինբուրգում տեղի ունեցած սպանություններին հնարավոր մասնակցության համար, հանգեցրել է դիվանագիտական սկանդալի: Հիմնական կասկածյալներից երկուսը՝ եղբայրներ Զիեդդին և Հուսեյն Սաֆարովները, մահացել են ռուս ուժայինների կողմից օրերս ձերբակալվելուց հետո, ըստ քննիչների, սուր սրտային անբավարարության պատճառով:
Ադրբեջանի իրավապահները պնդում են, որ եղբայրները մահացել են ռուս իրավապահների կողմից խոշտանգումների ենթարկվելու հետևանքով։
Հուլիսի 1-ին հայտնի դարձավ, որ Եկատերինբուրգում ձերբակալվել է Եկատերնբուրգում ադրբեջանական սփյուռքի ղեկավար Շահին Շիխլինսկին։
Ադրբեջաանի ՆԳՆ-ն քրեական գործ է հարուցել «Սպուտնիկ Ադրբեջան»-ի դեմ, ՆԳՆ-ն «Russia Today» («Sputnik Azerbaijan») լրատվական գործակալության Բաքվի մասնաճյուղում խուզարկություն է իրականացրել, ձերբակալվել է 7 մարդ։
Երեկ հայտնի դարձավ, որ Ադրբեջանում ձերբակալվել են նաև Ռուսաստանի քաղաքացիներ՝ թմրանյութերի ապօրինի շրջանառության կասկածանքով:
Ադրբեջանը հայտարարել է Ռուսաստանում իր քաղաքացիների իրավունքների խախտման մասին:
Ադրբեջանի դեսպան Ռահման Մուստաֆաևը Ռուսաստանին բողոքի նոտա է հանձնել Ռուսաստանի արտաքին գործերի նախարարություն (ԱԳՆ) այցելության ժամանակ:
Ռուսաստանի արտաքին գործերի նախարարության տվյալներով՝ պատճառը «Եկատերինբուրգում օրենքի լուրջ խախտումներն» էին:
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան զգուշացրել է, որ Ադրբեջան ուղևորություններ պլանավորող հայրենակիցները պետք է հաշվի առնեն ընթացիկ իրավիճակը։
Ադրբեջանը ձերբակալում է զորակոչից խուսափելու համար Բաքու տեղափոխված ռուսաստանցի ծրագրավորողներին:
