Ամենափրկիչ եկեղեցին շատ փորձությունների է ենթարկվել. տանկերով փորձել են քանդել զանգակատունը, հետո՝ պայթեցնել
Գյումրու Սուրբ Ամենափրկիչ եկեղեցին միշտ եղել է քաղաքի գերիշխող կառույցը, որի շուրջն է կառուցապատվել բնակավայրը։ Ամենափրկիչը կառուցվել է 1860-70-ականներին Անիի մայր տաճարի նմանությամբ։ Շինաշխատանքների ղեկավարը Թադևոս Անտիկյանն է եղել, Գյումրիում հայտնի Անտիկենց Թաթոսը։ Եկեղեցու կառուցումն ավարտվել է 1873 թվականին և հենց այդ ժամանակ էլ առաջին անգամ օծվել է։
Ամենափրկիչ եկեղեցին շատ փորձությունների է ենթարկվել։ 1932 թվականին տանկերով փորձել են քանդել զանգակատունը, իսկ հետո՝ պայթեցնել։ 1960-ականներին զանգակատունը վերականգնել են։ Խորհրդային տարիներին Ամենափրկիչը ծառայել է որպես ֆիլհարմոնիայի դահլիճ։
1988 թվականի երկրաշարժի ժամանակ եկեղեցին մասամբ ավերվել է։ Վերականգնումն սկսվել է 1995 թվականից։ Աշխատանքները ղեկավարել է ճարտարապետ Ռաֆիկ Եղոյանը։ Շինաշխատանքները մի քանի անգամ նոր թափ են ստացել և ֆինանսների բացակայության պատճառով կրկին կանգ առել։ 2002 թվականից եկեղեցու վերականգնման աշխատանքների ծախսն իր վրա է վերցրել Գյումրու նախկին քաղաքապետ Վարդան Ղուկասյանը։ Եկեղեցու վերականգնման համար հանգանակություններ են կատարվել նաև ժողովրդի կողմից։ 2014 թվականին Գարեգին 2-րդ կաթողիկոսը օծել է եկեղեցու խաչերը և դրանք տեղադրվել են գմբեթի և զանգակատան վրա։ Ամենափրկիչ եկեղեցին վերաբացվել է 2023 թվականին։ Երկրաբանական գիտությունների դոկտոր, պրոֆեսոր Սերգեյ Նազարեթյանի խոսքով` Ամենափրկիչն իր բարձրությամբ համարժեք է Այա Սոֆիա տաճարի բարձրությանը։
