Ոստիկանության նախնական «ստուգատեսներն» ու պետռեգիստրի «բաղձալի» տվյալները. ՀՀ-ում հաշվառված է 3.302.424 մարդ

Նոյեմբեր 04,2015 14:41

ՀՀ ոստիկանությունն, ի պատասխան ԳԱԼԱ-ի հրապարակումներին, որոնք առնչվում են ուռճացված ընտրացուցակներին, պարզաբանում է, որ ՀՀ ընտրողների ռեգիստրը ձևավորվում է բնակչության պետական ռեգիստրի տվյալների հիման վրա: Իսկ պետական ռեգիստրի տվյալները տարեցտարի աճում են, հետեւաբար, ընտրացուցակներում եւս ընտրողների թիվն ավելանում է:

«Մարդը կարող է մեկնել, համապատասխան գրություն չուղարկել, հետեւաբար նրա տվյալները մնում են պետռեգիստրում: Տրամաբանությունը հուշում է, մահացածներն ավելի շատ չեն, քան ծնվողները եւ 18 տարին լրացածները: Դա ամբողջ աշխարհում է այդպես: Եթե մեկնած քաղաքացիները համապատասխան փաստաթղթավորում չեն արել, դա պետռեգիստրում չի երեւում»,- ԳԱԼԱ-ի հետ զրույցում նշեց ՀՀ ոստիկանության լրատվության եւ հասարակայնության հետ կապերի բաժնի պատասխանատու Աշոտ Ահարոնյանը:

«Ազգային վիճակագրական ծառայության կողմից կատարված վերլուծությունները և հրապարակումներն ընտրողների ռեգիստրի հետ կապ ունենալ չեն կարող: Նշված ծառայության կողմից հրապարակված մշտական բնակչության թվաքանակը չի ներառում մեկ տարուց ավելի բացակայողների տվյալները: Եթե վիճակագրական ցուցանիշներում ներառվեն նաև այն անձանց տվյալները, ովքեր մեկ տարուց ավելի ժամկետով բացակայում են իրենց բնակության վայրերից, կունենանք անհամեմատ ավելի մեծ ցուցանիշ»,- նշում է ՀՀ ոստիկանությունը:

Ցուցանիշն անհամեմատ մեծ է բնակչության պետական ռեգիստրում, քանի որ այնտեղ տեղ են գտնում ՀՀ քաղաքացիներ, ովքեր գուցե նաեւ անվերադարձ հեռացել են Հայաստանից: Բացակա անձանց չեն հանում ցուցակներից, անկախ այն հանգամանքից, թե քանի տարի այդ անձնավորությունը Հայաստանում չի ապրել:

Հիմնավորումը հետեւյալն է՝ իսկ եթե ընտրությունների օրը նա որոշի վերադառնալ Հայաստան եւ մասնակցե՞լ ընտրություններին:

«ՀՀ ոստիկանությունը՝ որպես բնակչության պետական ռեգիստրը և ընտրողների ռեգիստրը վարող լիազոր մարմին, իրավասու չէ օտարերկրյա պետությունում գտնվող և տվյալ համայնքում հաշվառում ունեցող անձին սեփական նախաձեռնությամբ հանելու ընտրողների ցուցակներից»,- նշում են ոստիկանությունից:

Միեւնույն ժամանակ, ընտրացուցակներում ընդգրկելով բացակա անձանց տվյալները՝ որեւէ երաշխիք իշխանությունները չեն տալիս, որ տասնյակ տարիներ Հայաստանից բացակայած անձանց փոխարեն մեկ ուրիշը չի քվեարկի ընտրությունների օրը: Իշխանությունները բնականաբար չեն էլ փորձում որեւէ մեխանիզմ ներդնել, որը կբացառի կամ կհերքի, որ նաեւ ընտրացուցակների հաշվին են ապահովում իրենց սահուն վերարտադրությունը:

Ո՞վ չգիտի, որ տարիներ շարունակ անվերադարձ Հայաստանից հեռացած քաղաքացին ամենեւին էլ չի գալիս ընտրություններին մասնակցելու, որ հաստափոր ընտրացուցակները գլխավոր զենքն են ընտրակեղծարարների, որ հնարավորության դեպքում, եթե հանկարծ այս կամ այն ընտրատեղամասում բավարար վերահսկողություն չլինի, կարողանան շատ հանգիստ «նկարչությամբ» զբաղվել եւ ԿԸՀ ուղարկել կլորացված թիվ՝ իշխանության օգտին եւ բացակա անձանց հաշվին:

Հարց է առաջանում. եթե բացականերին չեն հանելու, համայնքային ոստիկանության ներկայացուցիչներն ինչո՞ւ են ընտրություններից առաջ տնետուն ընկած ճշտում՝ ովքեր են բացակա տվյալ ընտանիքից, ե՞րբ են գնացել, գալո՞ւ են արդյոք, քանիսն են ընտրողների թիվը, ովքեր են ժամանակավոր բացակաները եւ այլն: Ի՞նչ նպատակ են հետապնդում այդ տնային այցելությունները, եթե ոչ նախնական «ստուգատես»՝ ո՞ւմ փոխարեն կարելի է քվեարկել, ում՝ ոչ: Նման այցեր կատարվել են նաեւ այս օրերին:

Եթե պետռեգիստրի տվյալները համեմատենք Ազգային վիճակագրական ծառայության կողմից կատարված վերլուծությունների և հրապարակումների հետ, մասնավորապես մշտական բնակչության, մոտավոր հաշվարկներով կստանանք այն թիվը, որը բացակա է Հայաստանից՝ ավելի քան մեկ տարի: (Յուրաքանչյուր վարչական միավորի մշտական բնակչության թվաքանակի ցուցանիշը ձևավորվել է մարդահամարի ժամանակ տվյալ տարածքում մշտապես (սովորաբար) բնակվող ու հաշվառման պահին ներկա և ժամանակավոր բացակա հաշվառված անձանց ընդհանուր թվաքանակների հանրագումարից:)

Ոստիկանության նախնական «ստուգատեսներն» ու պետռեգիստրի «բաղձալի» տվյալները. ՀՀ-ում հաշվառված է 3.302.424 մարդ

Նորություններ