«Պատիվ ունեմ» խմբակցությունը վարչապետ Փաշինյանին անվստահություն հայտնելու ԱԺ հայտարարության նախագիծ է ներկայացրել
Սեպտեմբեր 16,2025 12:54
«Պատիվ ունեմ» խմբակցության պատգամավոր Հայկ Մամիջանյանը ֆեյսբուքյան գրառմամբ տեղեկացնում է, որ ՀՀ վարչապետին անվստահություն հայտնելու ԱԺ հայտարարության նախագիծ են ներկայացնում, որով նախատեսվում է հետևյալ քայլերի հերթականությունը.
- Վարչապետին անվստահություն հայտնելու գաղափարի շուրջ պատգամավորների կոնսոլիդացիա։
- Ազգային միասնության անցումային կառավարության ձևավորում, որի գերակայությունները պետք է լինեն՝
- կայունացնել ազգային անվտանգության իրավիճակը,
- վերականգնել օրենքի գերակայությունը, ազատ արձակել բոլոր քաղբանտարկյալներին և երաշխավորել ժողովրդավարական ազատությունները,
- վերականգնել հանրային համերաշխության մթնոլորտը,
- կազմակերպել ազատ, արդար և մրցակցային խորհրդարանական ընտրություններ,
- կասեցնել Հայաստանի միջազգային հեղինակության անկումը,
- զերծ պահել երկիրը տնտեսական ցնցումներից,
- միջազգային հարթակներում առաջ մղել ռազմագերիների և Արցախի ռազմաքաղաքական ղեկավարության վերադարձի հարցը։
«Մենք կոչ ենք անում բոլոր քաղաքական ուժերին, քաղաքացիական հասարակությանը և անհատ քաղաքացիներին, ովքեր հավատում են Հայաստանի ապագային, միավորվել իշխանափոխության այս պահին ամենաիրատեսական եղանակի՝ վարչապետին անվստահություն հայտնելու գործընթացի շուրջ։
Փոփոխությունների ժամանակը հիմա է՝ նախքան վերահաս և հնարավոր է՝ կործանարար նոր աղետները»,-նշված է հայտարարության մեջ։
