Գյումրիի Ամենափրկիչ եկեղեցուն կից պուրակի հատման ենթակա ծառերի զգալի մասը կենսունակ են
Հանրային լսումներ, ապա ավագանու նիստ. իրարամերժ կարծիքների արդյունքում այնուհանդերձ ձևավորվեց մեկը`Գյումրիի Ամենափրկիչ եկեղեցուն կից պուրակում գտնվող 51 բարդի հատվելու է`փոխարինվելով նորերով:
Օրակարգային հարցն ավագանու նիստում հաստատվեց ձայների 22 կողմ, 1 դեմ և 1 ձեռնպահ հարաբերակցությամբ: Մի քանի պատճառ է նշվում. ծառերը խոչընդոտում են եկեղեցու հարակից պուրակում տարվող շինաշխատանքների ընթացքին. ծավալվող արմատները վնասում են ստորգետնյա ենթակառուցվածքներին, իսկ բարդիները կենսունակությունը կորցրած են:
Վերջին մտքի հետ համամիտ չէ նախագծին միակ դեմ քվեարկած ավագանու անդամ Կարեն Մալխասյանը: Նա օրինակ է բերում փողոցի սկզբնամասում խորը էտած ծառը, որը դարձյալ կանաչել է: «Կատեգորիկ որոշել, որ 51 ծառն էլ կենսունակությունը կորցրել են, ճիշտ ձևակերպում չէ»,-նշում է նա՝ ընդգծելով, որ առաջարկել է կենսունակության վերաբերյալ փորձաքննություն ներկայացնել:
«Որտեղ շինարարություն է, փորել, տեսել են, որ կոմունիկացիաները խանգարում են, չեն քննարկում կենսունակության հարցը»: Ավագանու անդամը թե մեկ, թե մյուս դեպքում իրատեսական է համարում հարցը լուծել մասնակի հատմամբ՝ պարբերաբար յուրաքանչուր 3-րդ կամ 4-րդ ծառը նորով փոխարինելով` կանաչ գոտին անապատի չվերածելու համար: Իսկ թե ինչ ծառեր են տնկվելու, քանի տարեկան, և ինչ գումարների մասին է խոսքը, չգիտի:
Բնապահպան Գևորգ Պետրոսյանն ընդգծում է, որ ցանկացած քաղաքաշինական նախագիծ կազմելիս՝ նախ պետք է հաշվի առնել, որ այդտեղ ծառեր կան, իսկ հատման դեպքում էլ փոխարինումը կատարվի համարժեք, այն է` 10-15-ամյա փակ արմատային համակարգ ունեցող հասուն ծառերով, որպեսզի մեղմվի հասցվող բնապահպանական վնասը, իսկ միջավայրում ունենանք արդեն պատրաստի ծառ: Բնապահպանը նաև նշում է՝ ծառերի զգալի մասը կենսունակ են, սակայն հիմնավորումը քաղաքաշինական է: Միջազգային փորձը մատնանշելիս էլ առաջարկում է հաշվի առնել, որ դրանք որոշակի ծախսեր են պահանջում:
Քանի որ հատման ենթակա ծառերի մի մասը Շահումյան 188ա շենքի դիմաց են գտնվում, լսեցինք նաև շենքի բնակիչների դիտարկումները: Ոմանք կտրականապես դեմ են հատմանը և չեն պատկերացնում, որ մարդը կարող է դժգոհ լինել ծառից: Մեկ այլ բնակիչ, ցույց տալով չորացած ծառը, կողմ արտահայտվեց չորացածների հատմանը՝ դրանց առկայությունը անգամ վտանգավոր համարելով:
Ելենա Ավետիսյան
