Թրամփն ու Պուտինն այսօր երեկոյան կհանդիպեն Ալյասկայում․բանակցությունների թեման ուկրաինական պատերազմն է
ԱՄՆ և ՌԴ նախագահներ Դոնալդ Թրամփն ու Վլադիմիր Պուտինն այսօր բանակցություններ կանցկացնեն Ալյասկայում, քննարկման հիմնական թեման ուկրաինական պատերազմն է։
«ԱՄՆ նախագահի հույսերը Ուկրաինայում հրադադարի վերաբերյալ անորոշ են, բայց Պուտինը վերջնական առաջարկ է արել հնարավոր միջուկային համաձայնագրի վերաբերյալ, որը կարող է օգնել երկուսին էլ փրկել իրենց դեմքը: Ռուսաստանի և ԱՄՆ առաջնորդների հանդիպումը Ալյասկայի Սառը պատերազմի ժամանակաշրջանի ռազմաօդային բազայում կլինի նրանց առաջին դեմ առ դեմ զրույցը Թրամփի Սպիտակ տուն վերադառնալուց հետո։ Այն տեղի է ունենում Ուկրաինայում և Եվրոպայում առկա մտահոգությունների ֆոնին, որ Թրամփը կարող է դավաճանել Կիևին»,-գրում է Reuters-ը:
Հանդիպումը տեղի է ունենալու Մոսկվայի ժամանակով 22:30-ին, Էլմենդորֆ-Ռիչարդսոնի ռազմաօդային բազայում։
Reuters-ի փոխանցմամբ՝ Թրամփը, որն ավելի վաղ ասել էր, թե Ռուսաստանի պատերազմը Ուկրաինայի դեմ կավարտի 24 ժամում, երեկ ասել է, որ երեքուկես տարվա հակամարտությունն ավելի բարդ է լուծել, քան ինքը կարծում էր։
Եթե իր հանդիպումը Պուտինի հետ լավ անցնի, ապա դրան հաջորդող եռակողմ գագաթնաժողովի անցկացումը՝ Ուկրաինայի նախագահ Վլադիմիր Զելենսկու հետ, որն Ալյսակայի հանդիպմանը հրավիրված չէ, կլինի իր և Պուտինի հանդիպումից էլ ավելի կարևոր, ասել է ԱՄՆ նախագահը։
Ռուսական լրատվամիջոցները հղում անելով Կրեմլի ներկայացուցիչ Յուրի Ուշակովին, գրում են, որ երկու երկրների առաջնորդները կքննարկեն խաղաղության և անվտանգության ապահովման խնդիրները, ինչպես նաև միջազգային և տարածաշրջանային օրակարգի հարցերը։
Հանդիպման ընթացքում փաստաթղթերի ստորագրում չի նախատեսվում։ Առաջնորդները ձեռք բերված պայմանավորվածությունների մասին կխոսեն համատեղ մամուլի ասուլիսի ժամանակ։
