«Այս փաստաթղթով էլ փրկիչներ չենք գտել»․Արարատ Միրզոյանը ՀՀ-ԱՄՆ ռազմավարական համագործակցության փաստաթղթի մասին

ԱԺ-ում ՀՀ ԱԳ նախարարն ասաց, որ ՀՀ-ԱՄՆ օրերս ստորագրված փաստաթղթի մասին մանիպուլյացիոն հայտարարություններ եղան, ոմանք ասում էին՝ վերջ, փրկվանք։ Պետք չէ փրկիչներ ման գալ հյուսիսում, հարավում, արեւելքում, արեւմուտքում, որեւէ տեղ

Այսօր խորհրդարանում ԱԺ-կառավարություն հարցուպատասխանի ժամանակ ՀՀ ԱԳ նախարար Արարատ Միրզոյանն անդրադարձավ հայ-ամերիկյան ռազմավարական համագործակցության փաստաթղթին։

Նրա խոսքով՝ ԱՄՆ-ի հետ համագործակցության ոլորտները բազմաթիվ են՝ սկսած տնտեսական համագործակցությունից, վերջացրած անվտանգության և պաշտպանության ոլորտներում համագործակցությամբ, մեր ժողովրդավարական ինստիտուտներին աջակցությամբ․«Շատ հաջողված փաստաթուղթ է»։

Միրզոյանն անդրադարձավ նաև ստորագրված այս փաստաթղթի մասին մեկնաբանությունենրին․«Հետաքրքիր մանիպուլյացիոն գործընթացներ եղան։ Մի մասն ասաց՝ փրկվանք, վերջ։ Ժողովուրդ ջան, չփրկվենք, եւ պետք չէ ընդհանրապես   փրկիչներ ման գալ։ Ինչպես պետք չէր առաջ փրկիչներ ման գալ հյուսիսում, հիմա պետք չէ փրկիչներ ման գալ հյուսիսում, հարավում, արեւելքում, արեւմուտքում, որեւէ տեղ։ Եթե մենք փրկվելու ձեւ ունենք, մենք ինքներս պետք է այնպես անենք, որ եւ փրկվենք եւ զարգանանք, ամրանանք։ Մենք փրկիչներ չենք փնտրում, և այս փաստաթղթով էլ փրկիչներ չենք գտել»։

Նախարարի ներկայացմամբ՝ ՀՀ-ն տարիներ շարունակ ԱՄՆ-ի հետ ունեցել է համագործակցության մի ֆորմատ, որը կոչվել է ռազմավարական երկխոսություն։  Նա հիշեցրեց, որ գարնանը հայտարարվել է, որ ԱՄՆ-ի հետ հարաբերությունները մտադիր են բարձրացնել մի մակարդակ ավել՝ ռազմավարական գործընկերության:  Եվ ահա  փաստաթուղթը ստորագրվել է։ Ըստ Միրզոյանի՝ մի քիչ փոխել ենք համագործակցության ֆորմատը, նշել ենք նոր ուղղություններ, նոր ոլորտներ և հնարավորություններ։

«Էն մյուս խումբ մարդիկ էլ ասում են՝  սա ռազմական դաշինք է, ընդհանրապես այդպես չէ։ «Ամենափայլունն» այն մի խումբն էր, որ ասում էր՝ լավ ա, վատ ա, բայց մեզ սրա համար Թեհրանն ու Մոսկվան մեզ պատժելու են։ Ես վերադարձել եմ Մոսկվայից, աշխատանքային այցով էի մեկնել։ Իմ տեղակալը մեկ օր առաջ վերադարձել է Թեհրանից։ Մենք Մոսկվայի ու Թեհրանի մեր գործընկերների հետ շատ սերտ ու ամենօրյա կապի մեջ ենք, փոխըմբռնման մթնոլորտում ենք աշխատում»։

ՀՀ արտգործնախարարի խոսքով՝ մեզ առաջնորդում է բացառապես ՀՀ շահը․«Մենք սուվերեն երկիր ենք, և բոլոր երկրների հետ էլ ուզում ենք զարգացնել մեր հարաբերությունները, ու որոշում ենք՝ ինչպես և ում հետ, ինչքան, իսկ ում հետ էլ վատ հարաբերություններ ունենք՝ փորձում ենք կարգավորել։ Մեր բոլոր գործընկերները, ովքեր հարգում են մեր ինքնիշխանությունը, թող հարգալից մոտենան նաև մեր այս դիրքորոշմանը»։

Միրզոյանն ասաց, որ շատ կարևոր է ընկալել այն, ինչ կա՝ ոչ պակաս․«Որովհետև իսկապես կարևոր փաստաթուղթ է, և այն որևէ կերպ անփայլ փաստաթուղթ անվանել հնարավոր չէ, եթե ուզում ես օբյեկտիվ գնահատել։ Ոչ էլ ավել։ Այն ռազմական դաշինք անվանել էլ չի կարելի, այն ընդհանրապես պայմանագիր չի, կանոնադրություն է։ Եկեք ճիշտ քայլերով, բալանսավորված ու վստահաբար գնանք առաջ»։

Սյուզան Խառատյան