Հայամետ սենատորի համբավ ունեցող Բոբ Մենենդեսը դատապարտվեց 11 տարվա ազատազրկման
Մենենդեսը դատապարտվել է կաշառակերության և կոռուպցիայի մեղադրանքով
ԱՄՆ նախկին սենատոր Բոբ Մենենդեսը, որը հայտնի է հայամետ հայտարարություններով, կաշառակերության և կոռուպցիայի մեղադրանքով դատապարտվել է 11 տարվա ազատազրկման։ Այս մասին հայտնում են ամերիկյան լրատվամիջոցները։
«Սա քաղաքական դատավարություն է»,- ասել է Մենենդեսը դատավարությունից հետո։
2024 թվականի հուլիսին երդվյալ ատենակալները Մենենդեսին մեղավոր են ճանաչել 16 հոդվածներով, այդ թվում՝ կաշառակերություն, շորթում, խարդախություն, արդարադատության խոչընդոտում և որպես օտարերկրյա գործակալ:
Մեղադրող կողմի տվյալներով՝ Մենենդեսն ու նրա հայազգի կինը Եգիպտոսի և Կատարի կառավարությունների համար լոբբինգ անելու դիմաց ստացել են կանխիկ գումար, ոսկու ձուլակտորներ և այլ նվերներ։ Քննիչները ենթադրում են, որ նա խոստացել է հեշտացնել Եգիպտոսին ռազմական մատակարարումների և օգնության համակարգումը։
Մենենդեսը դատավորից ներում է խնդրել՝ երկու անգամ արտասվելով։
«Ես կորցրել եմ ամեն ինչ»,- հայտարարել է սենատորը իր գործողությունների մասին պատմելիս, նշելով՝ «դրանք կատարել եմ ուրիշներին օգնելու համար, երբ Սենատում էի»։
Նա ասել է․«Յուրաքանչյուր օրն արթուն լինելը պատիժ է մի մարդու համար, ով իր ողջ կյանքն անցկացրել է պետական պաշտոնում»։
Մենենդեսը հրաժարական է տվել անցած տարի օգոստոս ամսին։ Նա ԱՄՆ առաջին պետական պաշտոնյան է, ով դատապարտվել է պաշտոնավարման ընթացքում որպես օտարերկրյա գործակալ հանդես գալու համար:
