Արմեն Գրիգորյանը հնարավոր ռազմական գործողությունների մասին․«Եթե նման սպառնալիք տեսնենք, նման ինֆորմացիա ունենանք, կկիսվենք հանրության հետ»
Այսօր կառավարության նիստից հետո լրագրողները Անվտանգության խորհրդի քարտուղար Արմեն Գրիգորյանից հետաքրքրվեցին սահմանային իրավիճակի մասին, մասնավորապես՝ արդյոք ճի՞շտ են տեղեկություններն այն մասին, որ ՀՀ սահմանին Ադրբեջանը ռազմական ուժ է կուտակում։
«Պետք չէ հավատալ ասեկոսեներին, և հետևել նման ինֆորմացիայի աղբյուրներին: Եթե ինչ-որ հստակ ինֆորմացիա լինի, միանշանակ պաշտպանության նախարարությունը ինֆորմացիա տրամադրելու է: Սահմանային իրավիճակի հետ կապված ևս պարբերաբար տեղեկություն է տրամադրվում, հերքվում են նաև կեղծ տեղեկությունները»,-հայտարարեց Արմեն Գրիգորյանը։
Միաժամանակ նա հիշեցրեց ՀՀ-ի առաջարկը՝ սահմանային միջադեպերի հետաքննության մեխանիզմի մասին․«Մենք աշխատում ենք այն ուղղությամբ եւ ՀՀ առաջարկը շարունակում է մնալ սահմանային միջադեպերի հետաքննության մեխանիզմի ստեղծումը։ Եվ շարունակում ենք հրապարակային այս մասին խոսել եւ աշխատել այս ուղղությամբ, որպեսզի սահմանային միջադեպերի հետաքննության մեխանիզմ ունենանք»։
Ի պատասխան լրագրողների այն հարցերի, թե սահմանային ներկա լարվածության պայմաններում ո՞րքանով է հավանական պատերազմի վտանգը, Գրիգորյանն ասաց.«Հայաստանի Հանրապետության անվտանգության վերաբերյալ եթե մենք սպառնալիք տեսնենք, կամ ունենանք որևէ ինֆորմացիա, որը վերաբերում է Հայաստանի Հանրապետության անվտանգությանը, բնականաբար կկիսվենք հանրության հետ»:
Նիկոլ Մարգարյան
