Զոհ կամ տուժած քաղաքացիներ չկան․ՆԳՆ-ն Երևանում ավտովթարի հետևանքով առաջացած հրդեհի մասին
Երևան քաղաքի Արաբկիր վարչական շրջանի Սիլվա Կապուտիկյան փողոցում այսօր տեղի ունեցած վթարից բռնկված հրդեհի հետևանքով զոհ կամ տուժած քաղաքացիներ չկան։ Այս մասին այսօր լրագրողների հետ ճեպազրույցում հայտնել է ՆԳՆ հանրային հաղորդակցության և իրազեկման վարչության պետի տեղակալ Մարտուն Սիմոնյանը։
Նրա փոխանցմամբ՝ մարդատար ավտոմեքենաների վարորդները այդ ժամանակ տարածքում չեն եղել, իսկ բետոնախառնիչի վարորդին հաջողվել է առանց լուրջ վնասվածքների դուրս գալ մեքենայից:
Անվտանգության նկատառումներից ելնելով տարհանվել են մոտակա շենքերի բնակիչները:
Ավելի վաղ տեղեկացրել էինք, որ Երևանում վերընշված հասցեում իրար են բախվել 4 տրանսպորտային միջոցներ, որոնցից 3-ը՝ մարդատար, 1-ը՝ բետոնախառնիչ։ Վթարի հետևանքով դեպքի վայրում հրդեհ է բռնկվել:
Դեպքի վայր են ժամանել հրշեջ-փրկարարական 4 մարտական հաշվարկ: Հաջողվել է մեկուսացնել և մարել հրդեհը:
Նիկոլ Մարգարյան
