Հրապարակվել են կադրեր իրանական եթերից, թե ինչպես է Իսրայելը հարվածում Իրանի պետական հեռուստատեսության շենքին
Իսրայելը հարվածել է Իրանի պետական հեռուստատեսությանը։ Իրանական լրատվամիջոցները կադրեր են տարածել՝ ցույց տալով իսրայելական հարվածները։
Նույն տեսանյութը տարածել է նաև իսրայելական The Jerusalem Post-ը
Իսրայելի պաշտպանության նախարարը մինչ այդ զգուշացրել էր, որ «շուտով Իրանի պետական հեռուստատեսությունն ու ռադիոն կանհետանան»։ Իսրայելը տարհանման հրահանգ էր տվել Թեհրանի այն թաղամասի բնակիչներին, որտեղ գտնվում է հեռարձակողը։
Իրանի նախագահ Մասուդ Փեզեշքիանը Օմանի սուլթանի հետ հեռախոսազրույցի ժամանակ զգուշացրել է, որ «եթե Միացյալ Նահանգները չզսպի Իսրայելի տարածաշրջանային ագրեսիան, Իրանը կձեռնարկի ավելի ծանր և ցավոտ պատասխաններ»,-այս մասին հայտնում են իրանական լրատվամիջոցները։
Իրանի նախագահը շեշտել է, որ «Իսրայելի նման հանցագործությունները տեղի չէին ունենա առանց ԱՄՆ վարչակազմի կանաչ լույսի և աջակցության»։
Wall Street Journal-ն այսօր գրել է, որ Իրանը արաբ միջնորդների միջոցով ուղերձներ է ուղարկել Իսրայելին և ԱՄՆ-ին, որ ուզում է դադարեցնել ռազմական գործողություններն ու վերսկսել բանակցություններն իր միջուկային ծրագրերի շուրջ, ինչը հանգեցրել է նավթի գների անկմանը։ Այս մասին, ինչպես լրատվամիջոցն է գրում, հայտնել են Մերձավոր Արևելքի և Եվրոպայի պաշտոնյաները։
Նույն լրատվամիջոցի փոխանցմամբ՝ ԱՄՆ պաշտոնյան ասել է, որ նախագահ Թրամփը չեղարկել է Իսրայելի՝ Իրանի գերագույն առաջնորդ այաթոլլա Ալի Խամենեիին սպանելու ծրագիրը:
Մինչդեռ CNN-ը հղում անելով տարածաշրջանային դիվանագետին, գրում է, որ «Իրանը Օմանին և Կատարին ասել է, որ չի մասնակցի բանակցություններին Միացյալ Նահանգների հետ, քանի դեռ իրանական քաղաքները «շարունակում են ենթարկվել Իսրայելի հարձակմանը» և մինչև Թեհրանի պատասխանն ամբողջական չլինի։
Դիվանագետն, ըստ CNN-ի, նշել է, որ լրատվամիջոցների այն տեղեկությունները, որոնց համաձայն Իրանը խնդրել է Օմանին և Կատարին միջնորդել ԱՄՆ-ի հետ՝ Իսրայելի հետ հրադադար ապահովելու և միջուկային բանակցությունները վերսկսելու համար, «ճշգրիտ չեն»։ Դիվանագետը չի նշել, թե երբ է Իրանը նախատեսում ավարտել իր պատասխան գործողությունները։
