Փաստաբանին 2 անգամ թույլ չեն տվել ներկա գտնվել Շիրակի թեմի առաջնորդարանի խուզարկությանը
Շիրակի թեմի առաջնորդարանում մոտ 3 ժամ տևած քննչական գործողություններից հետո ՀՀ ազգային անվտանգության ծառայության աշխատակիցներն ու ոստիկանները հեռացան՝ իրենց հետ տանելով փաստաթղթերի 2 փաթեթ։
Հիշեցնենք՝ խուզարկությանը ներկա չեն եղել ո՛չ Շիրակի թեմի առաջնորդի կողմից լիազորված անձինք, ո՛չ էլ փաստաբանը։ Փաստաբան Թամարա Յայլոյանը լրագրողներին հայտնեց, որ ինքը վաղ առավոտյան համապատասխան փաստաթղթերով 2 անգամ ներկայացել է առաջնորդարան, տեղեկացրել, որ լիազորված է ներկա գտնվել քննչական գործողություններին, բայց ուժային կառույցների ներկայացուցիչները նրան ներս չեն թողել։
Խուզարկությունը կատարվել է առաջնորդարանի պահակի և հավաքարարի ներկայությամբ։ Գործողություններից հետո հավաքարարը շոկային վիճակում էր, հրաժարվեց զրուցել լրատվամիջոցների հետ։
Ըստ փաստաբան Թամարա Յայլոյանի, քննչական գործողություններն ապօրինի են, քանի որ չի կատարվել օրենքի պահանջը և Շիրակի թեմի առաջնորդ Միքայել արքեպիսկոպոս Աջապահյանի լիազոր ներկայացուցիչները խուզարկությունների ժամանակ ներկա չեն գտնվել։
