«Ամեն ինչ բարդացնում են»․ Հայաստան-Վրաստան սահմանը հատելու ուղևորափոխադրման նոր կանոնները դժգոհություն են առաջացրել

Այսօրվանից  ուժի մեջ են մտել  Հայաստան-Վրաստան և հակատակ ուղղությամբ  ոչ կանոնանվոր ուղևորափոխդրման նոր կանոնները՝ փոխադրողները պետական սահմանը հատելիս պետք է լրացնեն էլեկտրոնային հսկիչ փաստաթուղթը, որի մեջ նշված կլինեն երկրից դուրս եկող կամ մուտք գործող ուղևորների անուններն ու ազգանունները: Հսկիչ փաստաթուղթը պետք է ներկայացվի էլեկտրոնային եղանակով, իսկ վարորդն այն տպած վիճակում պետք է ներկայացնի վերահսկիչ մարմիններին։  Այս նոր կանոնները սահմանվել են Հայաստանի և Վրաստանի կառավարությունների միջև միջազգային ավտոմոբիլային հաղորդակցության մասին համաձայնագրի շրջանակում։

Որոշ ուղևորափոխադրողներ դժգոհում են նոր կարգից, ասում են՝ փաստաթղթերի լրացման գործընթացում տեխնկական խոչընդոտներ կան։

«Ամեն ինչ բարդացնում են: Ուղևորափոխադրող ընկերությունները խնդիրների առաջ են կանգնում: Վրաստան գնալուց ուղևորների տվյալներով փաստաթուղթը վարորդը պետք է ներկայացնի անցակետում: Վրաստանից Հայաստան հետ գալուց արդեն նմանատիպ փաստաթուղթ այնտեղ պետք է տպեն: Բայց վարորդը չի կարող: Տեղ չկա, վարորդը պետք է հանգստանա, որպեսզի մյուս ուղևորներին հետ բերի»,-RegiօnsTV-ի հետ զրույցում նշեց ուղևորափոխադրող ընկերության աշխատակից Արսեն Վարդանյանը:

Նրա խոսքով՝ Հայաստանից Վրաստան գնալիս ձևաթուղթը լրացրած ունեն, սակայն հաճախ է պատահում, որ չնախատեսված ուղևորներ են տեղափոխում։

Բացի այս, ուղևորափոխադրողներն անհանգսատացած են՝ եթե ճանապարհին մեքենան խափանվի,  ու ստիպված լինեն մարդկանց տեղ հասցնելու համար փոխել մեքենան, փաստաթղթի հետ կապված խնդիր է առաջանում։

«Եթե հանկարծ ճանապարհին մեքենան փչացավ, դու չես կարող այն փոխել, որովհետև օնլայն տարբերակով արդեն թուղթը տպել ես: Օրինակ՝ եթե Քոբուլեթիում մեքենան փչացավ, ուղևորներին ինչպե՞ս հասցնենք Երևան: Մինչև այս ուրիշ մեքենայով էինք տեղափոխում, որպեսզի երկար չսպասեն»,-ասաց Արսեն Վարդանյանը։

Նա նշեց, որ տեխնիկական տհաճ խնդիրներ կարող են առաջանալ, նկարագրեց․«Ես մեքենայով գնացել եմ Վրաստան ու այնտեղից պետք է տուրիստ բերեմ այստեղ: Երբ օդանավակայանից  դիմավորեմ  ուղևորին, ո՞րտեղ տպեմ համապատասխան փաստաթուղթը»:

Հաջորդ հնարավոր խնդիրը ըստ նրա, վարորդների ավելորդ ժամանակի վատնումն է, որը նրանք պետք է ծախսեն փաստաթղթի վրա.«Նրանք այդ ժամանակը կարող են օգտագործել հանգստանալու համար: Այս պայմաններում աշխատելով, հնարավոր է առաջանան նաև անվտանգային խնդիրներ: Եթե հանկարծ վթար եղավ, ուղևոր տուժեց, պատասխանատվությունը ստանձնելու է կազմակերպությունը, ոչ թե պետությունը: Երկար ճանապարհ գնացող վարորդի համար 1 ժամ ավել քնելը կարևոր է:  Իրենք չեն պատկերացնում նրբությունները, որովհետև գործի մեջ չեն»:

Նրա կարծիքով՝ լավ կլինի այս նոր կարգը մի քիչ հետաձգվի, մինչև այդ  ոլորտի մասնագետների հետ խնդիրները քննարկեն, նոր լուծումներ գտնեն։

Նիկոլ Մարգարյան