Ո՞րն է Աղին գյուղի մասնատման պատճառը․ իշխանությունների տասնամյակների անգործության հետևանքները
Ախուրյանի ջրամբարը Աղին գյուղը 5 մասի է բաժանել։ Որպեսզի բնակավայրը մասնատված չմնար, դեռ խորհրդային տարիներին որոշվել էր Աղինը նոր վայրում կառուցել՝ նոր բնակարաններով ու ենթակառուցվածքներով։ Բայց ծրագրով նախապատվությունը տրվել էր ջրամբարի կառուցմանը, գյուղի շինարարությունն անավարտ էր մնացել։ Աղինն այդպես էլ ամբողջական չդարձավ, մնաց մասնատված, առանձին հատվածներով, բնակիչներն էլ ՝ իրենց խնդիրների հետ մենակ․ ոմանք հին գյուղի վթարային տներում, ոմանք էլ՝ «Աղին» երկաթգծի կայարանին կից հատվածում, որտեղից նորակառույց Աղին ավան հասնելու համար պիտի ոտքով 2 կմ ճանապարհ հաղթահարեն։
Աղինում բոլորը չէին, որ կարողացան կես դար շարունակ այս խնդիրները հանդուրժել ու գյուղում մնալ։ Շատերը լքել են գյուղը, որտեղ ոչ միայն բնակպայմաններ չկան, այլև ապագայի հեռանկարն է անորոշ։ Աշխատատեղեր չկան, առանց ոռոգման համակարգի վարուցանք անելն արդյունք չի տալիս, շատերը նաև անասնապահությունից են հրաժարվել։
