Կարեն Անդրեասյանը նշանակվել է Միջազգային իրավական հարցերով ՀՀ ներկայացուցիչ
Վարչապետ Նիկոլ Փաշինյանի որոշմամբ, Կարեն Անդրեասյանը նշանակվել է Միջազգային իրավական հարցերով ՀՀ ներկայացուցիչ։
«Ղեկավարվելով «Հանրային ծառայության մասին» օրենքի 9-րդ հոդվածի 26-րդ մասով՝ Կարեն Անդրեասյանին նշանակել Միջազգային իրավական հարցերով ներկայացուցիչ»,–ասված է որոշման մեջ։ Հիշեցնենք, որ վարչապետ Նիկոլ Փաշինյանի երեկվա որոշմամբ միջազգային իրավական հարցերով ներկայացուցչի գրասենյակի ղեկավար Լիպարիտ Դրմեյանն ազատվեց պաշտոնից: Հիշեցնենք նաև, օրերս լրագրողների հետ ճեպազրույցում Փաշինյանը հայտարարել էր՝ «Կառավարությունում եթե կան մարդիկ որ իմ դիրքորոշմանը հակասող դիրքորոշում ունեն, հենց հիմա թող դիմում գրեն, շենքերից դուրս գան։ Եթե ոչ՝ ես ինքս նրանց կհանեմ»։
Փաշինյանն այս հայտարարությունն արել էր այն բանից հետո, երբ լրագրողները հետաքրքրվել էին՝ արդյոք կառավարությունը չի պատրաստվում կատարել Ստոկհոլմի արբիտրաժային ինստիտուտի որոշումը ՀԷՑ-ի վերաբերյալ, հատկապես որ իրավական հարցերով ՀՀ ներկայացուցիչն ասել է, որ միջազգային արբիտրաժի որոշումը պարտադիր է կատարման։ Միջազգային իրավական հարցերով Հայաստանի ներկայացուցչի գրասենյակը գործում է ՀՀ վարչապետի ենթակայությամբ։
