Շախմատի ԵԱ․ Կանանց Հայաստանի թիմը հաղթեց թուրքերին, տղամարդկանց թիմը խաղաց ոչ ոքի
Հոկտեմբեր 13,2025 21:45
Բաթումիում անցկացվող շախմատի Եվրոպայի թիմային առաջնության նախավերջին տուրում (8-րդ) Հայաստանի հավաքականները խաղացին Թուրքիայի թիմերի հետ։
Կանանց հավաքականը թուրքերին հաղթեց 3:1 հաշվով։
Մարիամ Մկրտչյանն ու Սուսաննա Գաբոյանը հաղթեցին, Էլինա Դանիելյանը խաղաց ոչ ոքի, Լիլիթ Մկրտչյանը պարտություն կրեց։
Հայաստանի թիմը 11 միավորով չորրորդն է։ Առաջատարը Լեհաստանն է՝ 14 միավոր։ Ուկրաինան ու Գերմանիան ունեն 13-ական միավոր։
Տղամարդկանց Հայաստանի թիմը թուրքերի հետ խաղաց ոչ ոքի՝ 2:2: Գաբրիել Սարգսյանը հասավ հաղթանակի, Ռոբերտ Հովհաննիսյանն ու Հայկ Մարտիրոսյանը վաստակեցին կեսական միավոր։ Շանթ Սարգսյանը պարտություն կրեց։
Թուրքիան ու Հայաստանը 9-ական միավորով 12-13-րդ տեղերում են։ Առաջատարներն են 13-ական միավոր վաստակած Ադրբեջանն ու Ուկրաինան։
