Հոնկոնգում բնակելի համալիրի ողբերգական հրդեհի զոհերի թիվը հասել է 128-ի
Հոնկոնգի բնակելի համալիրում տեղի ունեցած ողբերգական հրդեհի հետևանքով զոհերի թիվը հասել է 128-ի։ Այս մասին այսօր հայտնել են տեղի պաշտոնյաները։
CNN-ի փոխանցմամբ՝ Հոնկոնգի անվտանգության քարտուղարն այսօր ասել է, որ զոհերի թիվը կարող է աճել, քանի որ մոտ 200 անձի վիճակն անհայտ է։ Նա հավելել է, որ աղետի հետևանքով վիրավորվել է առնվազն 79 մարդ։ Իշխանությունները ստացել են անհետ կորածների 467 հարցում, որոնցից 39-ի մահը հաստատվել է։
Տեղի ոստիկանությունը հայտնել է, որ ձերբակալել է շինարարական ընկերության երեք պաշտոնյայի՝ չկանխամտածված սպանության կասկածանքով:
Չորեքշաբթի օրը Հոնկոնգի բնակելի թաղամասերից մեկում բռնկված աղետալի այս հրդեհը համարվում է 80 տարվա ընթացքում քաղաքի ամենասարսափելի հրդեհը, որը ոչնչացրել է հսկայական բնակարանային համալիրը: Համալիրը բաղկացած է ութ շենքից՝ 2,000 բնակարաններով, որտեղ ապրում է ավելի քան 4,600 մարդ։
Թեև հրդեհի պատճառների վերաբերբերյալ քննությունը շարունակվում է, սակայն Հոնկոնգի ոստիկանապետը հայտնել է, որ շենքերը պատված են եղել պաշտպանական ցանցով և պլաստիկով, որոնք կարող են չհամապատասխանել հրդեհային ստանդարտներին:
«Մենք հիմքեր ունենք կարծելու, որ ընկերության պատասխանատու կողմերը անփույթ են եղել, ինչը հանգեցրել է այս պատահարին և թույլ տվել, որ հրդեհը տարածվի՝ առաջացնելով մեծ թվով զոհեր»,-ասել է ոստիկանապետը:
Միաժամանակ տեղացի փորձագետները հրդհեի տարածման հավանական պատճառ են նշում բամբուկե շինափայտը, որոնք ասիական երկրներում լայնորեն կիրառվում են շինարարությունում։ Փորձագետները նշում են, որ թեև բամբուկի փայտը շատ հարմար է ու մատչելի, սակայն դրանք նաև դյուրավառ են։
CNN-ի փոխանցմամբ՝ տեղի իշխանությունները կարծում են, որ սկզբնական հրդեհը սկսվել է Վան Ֆուկ դատարանը կազմող ութ աշտարակների՝ Վան Չոնգի տան 6-րդ բլոկի ստորին հարկերում։ Այն խիտ բնակեցված համալիր է, որտեղ ապրում էր ավելի քան 4000 մարդ, որոնցից շատերը տարեցներ էին։
Հրդեհի պահին Վան Ֆուկ դատարանը վերանորոգման փուլում էր, և բոլոր ութ աշտարակները պատված էին բամբուկե կառույցներով և կանաչ պաշտպանիչ ցանցերով։ Ոստիկանությունը նախկինում շինարարական ընկերության անունը հայտնաբերել էր դյուրավառ պոլիստիրոլային տախտակների վրա, որոնք հրշեջները հայտնաբերել էին բնակարանային համալիրի որոշ պատուհաններ փակելիս։
Հոնկոնգի անվտանգության քարտուղարն ասել է, որ հրդեհի բռնկումը հանգեցրել է կանաչ ցանցերի բռնկման ու արագ տարածվել պատուհանների շուրջը գտնվող պոլիստիրոլային տախտակների վրա, ինչի հետևանքով հրդեհը բռնկվել է այլ հարկերում և շենքերում, ապա պոլիստիրոլը բռնկվելուց հետո բարձր ջերմաստիճանը հանգեցրել է պատուհանների կոտրվելուն, ինչի հետևանքով հրդեհը տարածվել է ներսում։
Քարտուղարն ասել է, որ շենքը պատող ցանցերը և բամբուկե կառույցները բռնկվել ու ընկել են, ինչի հետևանքով հրդեհը տարածվել է այլ հարկերում։ Նա հավելել է, որ հրշեջներն ու բնակիչները շենքի ներսում բախվել են ծայրահեղ պայմանների, որտեղ ջերմաստիճանը հասել է 500 աստիճան Ցելսիուսից։
Այժմ Հոնկոնգի իշխանությունները մտածում են բամբուկի փայտը փոխարինել մետաղյա շինանյութով։
Լուսանկարները՝ Tyrone Siu/Reuters
