«Յուրաքանչյուր հայտնաբերված մարմին Բաքուն հայտարարում է «Խոջալուի զոհ», թեև անհրաժեշտ է անցկացնել ԴՆԹ-փորձաքննություն, պարզել զոհվածի ինքնությունը»․ Մելիքյան
ԼՂ հակամարտության հետևանքով անհետ կորած մոտ 1300 հայերի ճակատագիրը անհայտ է մնում։ Այս մասին այսօր հրավիրված ասուլիսում «Իրավունքների պաշտպանություն առանց սահմանների» ՀԿ-ի ներկայացուցիչ Աննա Մելիքյանը։
Նրա խոսքով՝ Ադրբեջանը սահմանափակում է որոնողական աշխատանքներ և հետաքննություն իրականացնելու հնարավորությունները՝ հատկապես 2023 թվականից հետո իր վերահսկողության տակ անցած տարածքներում։
«Լեռնային Ղարաբաղում և շրջակայքում ակտիվ շինարարական աշխատանքներ են ընթանում, իսկ յուրաքանչյուր հայտնաբերված մարմին Ադրբեջանի իշխանությունները հայտարարում են «Խոջալուի զոհ», թեև անհրաժեշտ է անցկացնել ԴՆԹ-փորձաքննություն և պարզել զոհվածի ինքնությունը»,-ասաց Մելիքյանը։
Նրա խոսքով՝ Ադրբեջանի իշխանությունները, նույնիսկ ադրբեջանական կողմում մարդու գտնվելու կամ գերեվարման վերաբերյալ վկայությունների առկայության դեպքում, հերքում են, որ մարդիկ իրենց մոտ են․«Նույն խնդիրն է առաջանում, երբ դիմում ենք ՄԱԿ-ի աշխատանքային խմբին, մենք նրանց տասնյակ անձանց տվյալներ ենք փոխանցել, իսկ Բաքվից ստացված պատասխանում ասվում է, որ «տվյալներ չունեն և ասելու բան չկա»։ Սակայն պետք է հիշել, որ երբ մարդը գերի է ընկնում, պատասխանատվությունը կրում է պետությունը և պետությունը չի կարող հղում անել գերի վերցրած զինվորականից տվյալների բացակայության վրա և ձևացնել, թե կապ չունի»։
Նա նշեց, որ շատ կարևոր է միջազգային կազմակերպությունների միջնորդական դերը, անհրաժեշտ է ակտիվացնել աշխատանքը, չսպասել խաղաղության պայմանագրի ստորագրմանը, քանի որ յուրաքանչյուր օր աշխատում է մեր դեմ, կորում են ապացույցներն և մեր հայրենակիցների ճակատագիրը պարզելու հնարավորությունները։
