«Ակնկալում ենք, որ Հայաստանը կներկայացնի ականապատված բոլոր վայրերի ճշգրիտ քարտեզները»․ Հաջիզադե
«Միջազգային ճնշումներից հետո Հայաստանը տրամադրեց որոշ քարտեզներ, բայց դրանք ընդգրկում էին ականապատ տարածքների միայն մի փոքր մասը և միայն 25%-ով էին ճշգրիտ: Վերջին ականների պայթյունների դեպքերի ավելի քան 55%-ը տեղի է ունեցել այս քարտեզներով ընդգրկված տարածքներից դուրս»,-այս մասին Envoymag.com-ին ասել է Ադրբեջանի արտաքին գործերի նախարարության մամուլի քարտուղար Այխան Հաջիզադեն։
Նրա խոսքով՝ Հայաստանի տրամադրած քարտեզները ցույց են տալիս մոտ 400 հազար ականների տեղակայման վայրերը, սակայն իրական թիվը մոտ 1,5 միլիոն է։
Նա ասել է, որ ականների վտանգի առնչությամբ Հայաստանի դրսևորած նման վարքագիծը ևս մեկ հետընթաց է տարածաշրջանում հետկոնֆլիկտային ժամանակաշրջանում ձեռնարկված խաղաղության և վստահության ամրապնդման միջոցառումներից:
«Այս առումով մենք չափազանց կարևոր ենք համարում միջազգային հանրության կողմից հետևողական միջոցներ ձեռնարկել՝ դատապարտելու Հայաստանի կողմից բխող ականների սպառնալիքը և ակնկալում ենք, որ Հայաստանը կներկայացնի ականապատված բոլոր վայրերի ճշգրիտ քարտեզները, որոնք դեռ ամբողջությամբ չեն ներկայացվել Ադրբեջանին: Շատ կարևոր է, որ Հայաստանը տրամադրի ականների բոլոր տեղանքների ճշգրիտ քարտեզները, որպեսզի հնարավոր դառնա ներքին տեղահանվածների անվտանգ վերադարձը և տուժած շրջանների վերակառուցումը»,-ասել է Հաջիզադեն:
Envoy ամսագրում հրապարակված այս նյութի հեղինակը՝ Վուսալա Աբասովան է, որը հոդվածում նշում է, որ ինքը փախստական է Ղարաբաղից։
