«Տրամադրությունն էն չի, դիմացն էլ ցուրտ է»․Վարդան Ղուկասյանի առաջարկությամբ «Գյումրու օրը» չեղարկվել է, ՔՊ-ն տոնը նշելու հարցով արտահերթ նիստ է նախաձեռնում
Գյումրու ավագանու «Քաղաքացիական պայմանագիր» խմբակցությունը նախաձեռնել է արտահերթ նիստ, որի օրակարգում է «Գյումրու օր» տոնակատարության անցկացման հարցը։
Ավագանու երեկվա նիստում չեղարկվել է «Գյումրու օր» ամենամյա տոնակատարությունը։ Այս տոնակատարության կազմակերպման և անցկացման համար, ինչպես նիստի ժամանակ նշել է Գյումրու քաղաքապետարանի մշակույթի բաժնի պետ Լիլիթ Թովմասյանը, անհրաժեշտ է 6 միլիոն դրամի հատկացում։
Գյումրիի քաղաքապետ Վարդան Ղուկասյանը քվերարկությունից առաջ առաջարկել է հարցը հանել օրակարգից, նշելով․«Որովհետև զգում եմ՝ տրամադրությունն էն չի, դիմացն էլ ցուրտ է»։
«Իմ հզոր համայնք» խմբակցության ղեկավար Ռուբեն Մխիթարյանը պաշտպանել է միջոցառումը չեկարկելու քաղաքապետի առաջարկությունը, և այն առանց քվեարկության հանվել է օրակարգից։ Այսինքն, «Գյումրու օր» տոնակատարությունը պաշտոնապես չեղարկվել է։
Իսկ ահա ՔՊ-ն մտադիր է արտահերթ նիստ հրավիրել ու քննարկել այս տոնակատարությունն անցկացնելու հարցը։ Այս մասին իր ֆեյսբուքյան էջում գրել է խմբակցության ղեկավար Սարիկ Մինասյանը՝ նշելով, որ բազմաթիվ գյումրեցիներից զանգեր ու մտահոգություններ են ստանում տոնի չեղարկման առնչությամբ․«Գյումրեցուն չեն կարող զրկել տոնից և արդեն ավանդույթ դարձած օրը արժանվույնս նշելու հնարավորությունից»։
