«Թողեցինք ամենաթանկը՝ հայրենիքն ու գերեզմանները»․ Սառնաղբյուրից՝ Եղեգնավան
Բռնի տեղահանության օրերին Վարդանի և Արինեի ընտանիքը բեռնատարով է հասել Հայաստան։ Արցախի Ասկերանի շրջանի Սառնաղբյուր գյուղում են ապրել, սակայն այդ օրը Ստեփանակերտում են եղել, և չեն էլ հասցրել վերադառնալ տուն՝ իրենց հետ ինչ-որ իր վերցնելու համար։
Արցախից բռնի տեղահանված ընտանիքը հաստատվել է Արարատի մարզի Եղեգնավան բնակավայրում։
Ինչպես Regions TV-ի հետ զրույցում նշեց ընտանիքի մայրը՝ Արինե Գրիգորյանը, Արցախում են թողել ամեն ինչ՝ փաստաթղթերը, դրամական միջոցները, ավտոմեքենան, տունն ու տնտեսությունը։ Սակայն շատ ավելի ծանր ու ցավալի է հայրենիքի և իրենց հարազատների գերեզմանների կորուստը։
Արինեի ամուսինը՝ Վարդանը, մասնակցել է 1990-ականների ազատագրական պայքարին, 3-րդ կարգի հաշմանդամ է։
Եղեգնավանում տուն են վարձակալել, ամսական 50 հզր․ դրամը մեծ դժվարությամբ են կարողանում տալ։ 4 երեխա են մեծացնում, ավագ դուստրը ուսանող է Երևանում, մյուսները սովորում են Եղեգնավանի դպրոցում։
Աշխատանք չեն կարողանում գտնել, հողագործությամբ զբաղվելու համար էլ խանգարող հանգամանքներ կան։
Տեսանյութը՝ առանց մեկնաբանության։
