Փոփոխություններ ՌԴ միգրացիոն օրենսդրութունում. բարդացվել է վարորդական վկայական ստանալու և դպրոցներում սովորելու կարգը, նախատեսվում են նաև այլ փոփոխություններ
Ըստ ՌԴ նոր կարգավորումների՝ անցողիկ շեմը հաղթահարելու համար երեխաները պետք է հարցերի 90 տոկոսին ճիշտ պատասխանեն, այլապես որևէ պարագայում չեն կարողանա սովորել ՌԴ դպրոցներում
Ապրիլի 1-ից ՌԴ միգրացիոն օրենսդրությունում ուժի մեջ են մտել 2 նոր փոփոխություններ.այսուհետ օտարերկրյա երեխաներին ՌԴ դպրոցում սովորելու համար անհրաժեշտ է լինելու ռուսաց լեզվի քննություն հանձնել, իսկ անցողիկ շեմը չհաղթահարած երեխաները չեն կարողանալու սովորել դպրոցում: Ստւգվելու է նաև երեխայի ծնողների և երեխայի ՌԴ-ում գտնվելու օրինականությունը:
«Հայկական Կարիտաս» կազմակերպության միգրացիոն ծրագրի փորձագետ Տաթևիկ Բեժանյանն այսօր «Արմենպրեսի» մամուլիս սրահում անդրադառնալով փոփոխություններին, ասաց․ «Ստուգվելու է երեխայի ծնողների եւ երեխայի՝ ՌԴ-ում գտնվելու օրինականությունը։ Ովքեր ՌԴ են մեկնել ընտանիքներով եւ որոնց երեխաներն այս պահին սովորում են դպրոցներում, ապրիլի 1-ից խիստ ստուգումներ են սկսվել ՌԴ բոլոր դպրոցներում։ Եթե երեխաների գրանցումը կեղծ է կամ գրանցման ժամկետը լրացել է, ապա պատժվելու են նաեւ ծնողները։ Եթե նույնիսկ ծնողն օրինական է գտնվում, ապա հնարավոր է՝ նրա օրինական գտնվելը չեղարկվի, անգամ հնարավոր է՝ ծնողների ու երեխաների արտաքսում լինի»։
Նա հորդորեց կեղծ ռեգիստրացիաներ չգնել, իսկ եթե երեխան պատրաստվում է սովորել դպրոցում, Բեժանյանը խորհուրդտվեց մինչև ՌԴ մեկնելը երեխաներին պատրաստել․«Նրանք տվեք ռուսաց լեզվի պարապմունքների, որովհետև անցողիկ շեմը հաղթահարելու համար երեխաները պետք է հարցերի 90 տոկոսին ճիշտ պատասխանեն, այլապես որևէ պարագայում չեն կարողանա սովորել ՌԴ դպրոցներում»։
Նա ասաց, որ հիմա ստուգում են միգանտների՝ դպրոցներում արդեն իսկ սովորող երեխաներին․«Գրանցվել են դեպքեր, երբ դպրոցում ստուգում անցկացնելիս պարզվել է, որ երեխան կամ չունի միգրացիոն հաշվառում կամ կեղծ է փաստաթուղթը, եւ ծնողների հետ միասին երեխաներին տարել են օտարերկրացիների պահման վայր ու այնտեղից արտաքսել են։ Չնայած ՌԴ օրենսդրությամբ երեխաներին իրավունք չունեն տանել այդ վայրը, բայց տանում են»։
Անդրադառնալով օրենքի ներդրման հիմնավորմանը, թե լեզվին չտիրապետելու դեպքում կրթական գործընթացում երեխաները կբախվեն խնդիրների և դժվարությամբ կինտեգրվեն հասարակությանը, տիկին Բեժանյանը նշեց, որ այն այնքան էլ չի համապատասխանում միջազգային պրակտիկային, որպես օրինակ բերելով Եվրամիության մի շարք երկրներ, որտեղ ընդհանրապես նշանակություն չունի այն փաստը՝ միգրանտ երեխան տիրապետում է տվյալ պետության լեզվին, թե ոչ, հիմնավորելով.«Այս դեպքում կարևոր է այն, թե երկիրը իր համար ինչն է առաջնային համարում: Երկրներ կան, որոնք ընտրում են երեխայի կրթություն ստանալու իրավունքը, և փորձում են դպրոցներում այնպիսի համակարգ ներդնել, որ երեխան ընթացքում սովորի տվյալ լեզուն, բայց որևե պարագայում դուրս չմնա կրթական պրոցեսից»:
Հաջորդ փոփոխությունը, որը կրկին երեկ է ուժի մեջ մտել, վերաբերում է վարորդական իրավունքի ստացմանը։
«Մինչև 2025 թվականի ապրիլի 1-ը, բոլոր այն օտարերկրացիներին, որոնք ունեին բնակվելու իրավունք և կացության կարգավիճակ, կամ հանդիսանում էին երկքաղաքացի, հնարավորություն էր տրված պարզեցված կարգով՝ առանց քննություն հանձնելու փոխել իրենց ունեցած վարորդական վկայականը ՌԴ վարորդական վկայականով: Այսուհետ ՌԴ վարորդական իրավունք ձեռք բերելու համար, անկախ կարգավիճակից, բոլորը պետք է քննություն հանձնեն: Երկու անգամ ոստիկանների կողմից նման խախտում գրանցելու դեպքում անձը կստանա մուտքի արգելք»,-ասաց Բեժանյանը:
Այս փոփոխությունն է նաև պատճառներից մեկը, որ վերջին շրջանում միգրացիոն հոսքերը նվազել են մոտ 20-30 տոկոսով:
Տաթևիկ Բեժաանյանը խոսեց մեկ այլ փոփոխության մասին, ըստ որի հունիսի 30-ից Ռուսաստան մեկնողները պարտավորվում են 72 ժամ առաջ այդ մասին տեղյակ պահել ՌԴ համապատասպան մարմիններին.«Հունիսի 30-ից ոչ վիզային երկրների քաղաքացիները պետք է անցնեն գրանցման ընթացակարգ, միասնական նույնականացման և վավերացման համակարգում, օգտագործելով միասնական պորտալի բջջային հավելվածը: Դա պետք է լինի ոչ ուշ, քան ՌԴ ծրագրված այցից 72 ժամ առաջ, իսկ արտակարգ դեպքերում ոչ ուշ, քան 4 ժամ առաջ: Ստեղծվելու է համակարգ, որտեղ օտարեկրացին իր համար բացելու է «кабинет», լրացնելու է իր տվյալներն ու դիմելու է, որ ինքը պատրաստվում է մուտք գործել ՌԴ 72 ժամ հետո: Իր տվյալները ՌԴ պատկան մարմինների կողմից ստուգվելու են, ու եթե նրա մուտքը կթույլատրվի, նա կստանա համապատասխան կոդ, որը սահմանին կներկայացնի սահմանապահին: Հակառակ դեպոքում մուտքը հնարավոր չի լինի»:
Տիկին Բեժանյանը տեղեկացրեց նաև, որ այն պահին, երբ իրենց հասանելի կլինի մշակվող համակարգի վերջնական տարբերակը, կիրականացնեն լայնածավալ իրազեկում՝ ինչպես մեդիայի, այնպես էլ համայնքներում սպասվող հանդիպումների ընթացքում:
Նիկոլ Մարգարյան
