Շրջանառելով Վարդան Ղուկասյանի ապագա քաղբանտարկյալ լինելը, վատ ալիբի են ստեղծում, որով խրախուսում են անպատժելիությունը, շահարկելու են ամեն ինչ, որպեսզի իրականանա իրենց բաղձալի սցենարը․Վ․Գրիգորյան

Վարդան Ղուկասյանը հայտարարել է, որ իր փեսային է նշանակելու առաջին տեղակալ, դեռ ավագանու նիստ չեղած՝ Ղուկասյանն արդեն որպես քաղաքապետ է խոսում, պաշտոններ բաժանում

Եթե շահերի բախման պատշաճ ընթացակարգ ունենայինք, իհարկե, նման բան չէր լինի, Վարդան Ղուկասյանը չէր կարողանա իր դստեր ամուսնուն նշանակել Գյումրու քաղաքապետի տեղակալ։ Այսպիսի կարծիք հայտնեց REGIONSTV-ի հետ զրույցում Հելսինկյան քաղաքացիական ասամբլեայի Վանաձորի գրասենյակի ծրագրերի համակարգող Վարդինե Գրիգորյանն՝ անդրադառնալով Վարդան Ղուկասյանի երեկվա հայտարարությանը։

Վարդան Ղուկասյանը, որը Գյումրու արտահերթ ընտրություններում անցողիկ շեմը հաղթահարած մյուս երեք ուժերի  աջակցությամբ կընտրվի քաղաքապետ, երեկ մի քանի լրատվամիջոցի հետ զրույցում հայտարարել է, որ առաջին փոխքաղաքապետ է նշանակելու Կոմկուսի ցուցակի երկրորդ համարի թեկնածունին՝ իր դստեր ամուսնուն՝ Ավետիս Առաքելյանին։

Ըստ Վարդինե Գրիգորյանի՝ այս դեպքով կարող է զբաղվել Կոռուպցիայի կանխարգելման հանձնաժողովը՝ եթե որոշումների կայացման հետ կապված հարց առաջանա, որ իրենք իրավունք չունեն որոշումներ կայացնել, որոնք բխում են իրենց անձնական շահերից։

Նրա կարծիքով՝ շատ բարդ է Վարդան Ղուկասյանի հետ կապված գտնել մեկ սխալ, կենտրոնանալ հենց դրա վրա, որովհետև ցանկացած հարց առանձնացնելն արժեզրկում է այն մնացած բոլոր խնդիրները, որոնք առաջացել են, և ցավոք, դեռ կառաջանան Գյումրիում։

«Կդժվարանամ կոնկրետ այս հարցի մասին խոսել, որովհետև Վարդան Ղուկասյաննն ամբողջությամբ խնդրահարույց կերպար է՝ իր խոսույթով և այլն, նույնիսկ ձգտումը նրան, որ իր խոսքից  անընդհատ ինչ-որ թեմա դառնա։ Հիմա, երբ սկսել են ակտիվ շրջանառել իր ապագա քաղբանտարկյալ լինելը, դա խոսում է այն մասին, որ  շահարկելու են ամեն ինչ ու ավելի վտանգավոր թեմաներ են բացելու, որպեսզի վերջապես իրականանա իրենց բաղձալի սցենարը։ Այսինքն, նաև այն, որ Մարտուն Գրիգորյանը հայտարարել էր՝ Վանաձորի սցենարի կրկնումը։ Իմ կարծիքով՝ դրանք շատ մանիպուլյատիվ են, որովհետև իրականում չեղած տեղը ստեղծում են իմունիտետ քաղաքական գործիչների համար, ովքեր հանցագործություններ են կատարում»,-ասում է Գրիգորյանը։

Նրա խոսքով՝ այդ պարագայում ցանկացած հանցագործություն կատարելու դեպքում ցանկացած քաղաքական գործչի պետք է  համարեինք անձեռնմխելիություն ունեցող, որովհետև իր նկատմամբ հետապնդումը կարող էր մեկնաբանվել որպես քաղաքական հետապնդում․«Այսինքն, շատ վատ, տհաճ ալիբի են ստեղծում, որտեղ անպատժելիութունը խրախուսում են ամեն կերպ ու դրա մեջ առանձնացնել առաձին  բաղադրիչներ, իմաստ չունի»։

Գրիգորյանի դիտարկմամբ՝ եթե այդ ուժերի մոտ շոուից այն կողմ կա իրական քաղաքական մտադրություն ու պատասխանատվություն, ապա պետք է որ ունենան պատշաճ այլ թեկնածուներ, որոնք  կստանձնեն համայնքի ղեկավարի պաշտոնը՝ եթե դրա կարիքը լինի։
«Օրինակ՝ Բերդ համայնքում կար նման իրավիճակ, համայնքապետի նկատմամբ կային քրեական գործեր, նա ինքնաբացարկ հայտարարեց, իր ցուցակից այլ թեկնածու դարձավ համայանքապետ։ Հաշվի առնելով մեր տեղական ինքնակառավարման մարմինների կոռուպցիոն անցյալը՝ շատ  բնական է, որ քրեական հետապնդում կլինի, շատ անբնական է, երբ քրեական հետապնդումը տեղի չի ունենում քաղաքական կամ այլ պատճառներով։ Տրամաբանական կլիներ, որ քաղաքական ուժերն ունենային ողջախոհություն՝ մտածելու, որ իրենք պետք է ունենան այլ թեկնածուներ, որոնք այդքան խոցելի չեն։ Մարտուն  Գրիգորյանն էր նշել էր, որ Վարդան Ղուկասյանի նման խոցելի անձին դարձնելով համայնքի ղեկավար ուղիղ տանելու է դեպի Վանաձորի սցենարին, նրան կձերբակելեն, հետո աղմուկ կբարձրացնեն։  Վանաձորում էլ աղմուկ բարձրացավ, բայց իրականում ոչինչ չփոխվեց։ Գնալ անպատասխանատվության այս ճանապարհով, հույս ունեմ, որ չեն ընտրի, բայց այս ամբողջ գործընթացը չափազան անձակենտրոն էր»,-նշում է Վարդինե Գրիգորյանը։

Վարդան Ղուկասյանը երեկ լրագրողների հետ հանդիպմանն անդրադառնալով կադրային քաղաքականությանը, ասել է՝ ով լուրջ մասնագետ է, կաշխատի իսկ «ով ասենք ձիու խոդեր պտի անի, քաղաքական առումով է էդտեղ գտնվում, իհարկե, անելու բան չեն ունենա»։

Նա անցողիկ շեմը հաղթահարած «Իմ հզոր համայնքը» գլխավորող, պրոդյուսեր Ռուբեն Մխիթարյանին առաջարկել է ղեկավարել քաղաքապետարանի մշակույթի բաժինը․«Շատ լավ կզգամ, որ ինքը ղեկավարի ու միասին աշխատենք»։

Քաղաքի գլխավոր ճարտարապետ Հենրիկ Գասպարյանին, որն իր օրոք նույն պաշտոնն է զբաղեցրել, Վարդան Ղուկասյանը մտադիր է ազատել աշխատանքից, երեկ նա հայատարարել է՝ «միանշանակ ազատելու եմ, բայց պահելու եմ՝ որպես օրենքները իմացողի, բայց էդ կաբինետը ինքը չի մտնի, առանձին տեղ եմ տալու իրեն՝ հեռու, խորհրդատվություն անի էդ ոլորտի հետ կապված։ Ինքը էդտեղից դուրս է գալու, Տոռմուզ Հենդոն այլևս անելու բան չունի։ Էն գլխից էին իրեն ասում՝ «Տոռմուզ Հենդո»։
Հնարավո՞ր է «Քաղաքացիական պայմանագիր»-ը իր գլխավորած «Կումունիստական կուսակցության» ավագանու անդամներից  քվե «պոկի» ու ՔՊ-ի թեկնածուն ընտրվի քաղաքապետ, այս առնչությամբ Վարդան Ղուկասյանը երեկ ասել է․«․․․Մեզանից մարդ տանի՞, մենք ավելի շատ իրանցից կտանինք, քան իրենք մեզանից, ուրեմն ես էդքան թույլ մարդ եմ, հա՞։ Հլը դու ինձ նայի, ապրածիս նայի, ուրեմն ՔՊ-ան կարող է մեզանից մարդ տանի ու մենք չե՞նք կարող իրենցից տանել։ Ես էդ բաներին չեմ ուզում պատասխանել, կապրենք, կտեսնենք»։