Ապամոնտաժվել է Գյումրիում կառուցվող Արթուր Ալեքսանյանի անվան մարզահամալիրի մասնաշենքերից մեկի ծածկը
Գյումրեցի մարզիկները 2024 թվականին հանրապետական և միջազգային մրցումներից ավելի քան 500 մեդալ են բերել չեմպիոնների քաղաք։ Մեր մարզիկները շարունակում են նորանոր բարձունքներ նվաճել, բայց նրանք անհամարժեք, ոչ նպաստավոր պայմաններում են մարզումներ իրականացնում։
Քաղաքի մարզադահլիճների մեծ մասը հիմնանորոգման կարիք ունի։ 4 տարի առաջ, երբ մեկնակեց Արթուր Ալեքսանյանի անվան ըմբշամարտի մարզադպրոց-համալիրի շինարարությունը, մեծ էին սպասումները, որ Գյումրին շատ արագ կունենա միջազգային չափանիշներին համապատասխան մարզաբազա՝ ժամանակակից ենթակառուցվածքներով, մարզագույքով, մրցումային հարթակներով։
Բայց շենքի շահագործումը նախօրոք սահմանված ժամկետից 1 տարի ուշանալու է։ Պատճառը նախագծային սխալներն են։ Մոտ 20 տարվա կենսագրություն ունեցող նախագծող կազմակերպության՝ «Սարգիս և Մարիաննա» ՍՊԸ-ի թույլ տված սխալների պատճառով մարզահամալիրի 3-րդ մասնաշենքի ծածկը քանդվել է, նոր նախագիծ է պատվիրվել։ Նաև այս հանգամանքով պայմանավորված է շինարարությունը դանդաղել։
Այս մարզահամալիրի կառուցման հետևանքով մի կողմ են դրվել Գյումրու մյուս մարզադպրոցների շինարարության ծրագրերը, դրանք դեռ չեն ֆինանսավորվում։
