Ի՞նչ վիճակ է այս պահին Լիբանանում և Սիրիայում․ լիբանանահայ փորձագետի դիտարկումները
Իսրայելա-լիբանանյան ռազմական բախումներից հետո ի՞նչ վիճակ է այս պահին Լիբանանում, ի՞նչ ուղղակի և անուղղակի ազդեցություն են գործել Սիրիայում տեղի ունեցած զարգացումները Լիբանանի վրա։
Գործու՞մ են արդյոք Սիրիայի նոր վարչակարգի՝ տեղի հայ համայնքին տրված անվտանգության երաշխիքները, և ինչպե՞ս են աշխատել հայաշատ այդ երկրներում գործող ՀՀ դիվանագիտական ծառայությունները։
Այս և այլ հարցերի շուրջ REGIONS TV-ն զրուցել է Կովկասի և Մերձավոր Արևելքի հարցերով փորձագետ, լիբանանահայ քաղաքագետ Հովսեփ Դերդերյանի հետ։
Նրա խոսքով՝ այս պահին Լիբանանում անվտանգային վիճակը կայուն է, բայց ամեն օր իսրայելցիները հարվածներ են հասցնում Լիբանանին, չեն հարգում հրադադարը, ժամանակ առ ժամանակ իսրայելական անօդաչուները պտտվում են Բեյրութի երկնքում։
Ինչ վերաբերում է Սիրիային, ապա, ըստ քաղաքագետի, այդ երկրում վիճակն անկայուն է։ «Բաշար Ալ -Ասադի ռեժիմի ժամանակ կրոնական կոնֆլիկտներ չկային, սակայն հիմա վրեժխնդրության միտումներ են նկատվում Սիրիայում բնակվող քրիստոնյաների նկատմամբ։ Հալեպում, Դամասկոսում, Քեսաբում և այլ վայրերում հայերը շարունակում են ապրել, բայց զգուշավորություն են ցուցաբերում, ամեն դեպքում անհանգստություն կա, քանի որ չգիտենք, թե հաջորդ պահին ինչ կարող է լինել, որովհետև իշխանության ղեկին թուրքամետ կառավարություն է»,-հայտարարեց Դերդերյանը։
Արաբական այդ երկրներում գործող ՀՀ դիվանագիտական ծառայությունները, ըստ փորձագետի, ճգնաժամային իրավիճակներում արդյունավետ չեն գործել։ «Կուզենայի, որ Հայաստանի դեսպանատներն ավելի լավ աշխատեին, ճիշտ չէ, որ զանգահարում ես 2-3 ամիս, չեն պատասխանում, կամ նամակին մեկ շաբաթ հետո են պատասխանում»,-ընդգծեց Հովսեփ Դերդերյանը։
