Եղանակը նպաստավոր է տեղաբնակ դարձած արագիլների համար, որոնք բնադրել են տարբեր վայրերում
Հայ-թուրքական սահմանի մոտ գտնվող Երասխահուն, Արազափ, Արգավանդ, Տանձուտ, Ջանֆիդա և հարևան մյուս գյուղերում տաք ձմեռ է, գյուղացիներն ամփոփել են նախորդ տարին և պատրաստվում են 2025թ․-ի գյուղատնտեսական աշխատանքներին։ Տարածաշրջանի եղանակային պայմանները նպաստավոր են ոչ միայն տեղաբնակ մարդկանց, այլև տեղաբնակ դարձած սպիտակ արագիլների համար, որոնք բնադրել են ամենատարբեր վայրերում՝ ծառերի, սյուների, շենքերի կտուրների, աշտարակների և անգամ վերամբարձ կռունկի վրա։
REGIONS TV-ի նկարահանող խումբն աշխատել է Արմավիրի մարզի Մեծամոր համայնքի մի շարք բնակավայրերում, անդրադարձել տարբեր թեմաների, նաև արձանագրել կադրեր արագիլների ընտանեկան օջախներից։ Գեղեցիկ սպիտակափետուրները չեն չվել, նորոգում են և՛ իրենց բները, և՛ իրենց հարաբերությունները զույգերի հետ՝ կափկափյունով հաստատելով իրենց սերն ու հավատարմությունը։
Բարով, արագիլ, բախտի արագիլ,
Արագիլ գարնան, արագիլ ամռան,
Իմ տան մոտ ապրիր, բարի արագիլ,
Բույն հյուսիր ծառին, բարդու կատարին։
