«Թուրքի հետ ո՞նց ապրես», «Դեմ եմ», «Դեմ չեմ», «Լավ բան չեմ սպասում»․ իրարամերժ կարծիքներ Արմավիրի սահմանամերձ գյուղերից
Արմավիրի մարզի տարբեր բնակավայրերում՝ հայ-թուրքական սահմանի մոտ, իրականացվել են հարցումներ՝ պարզելու և ի մի բերելու կարևորագույն այն խնդիրները, որոնք մտահոգում են սահմանամերձ գյուղերի բնակիչներին:
REGIONS TV-ի աշխատանքային խումբը նկարահանումներ է իրականացրել Արաքս գետի ափամերձ գյուղերում՝ Մեծամոր համայնքի Երասխահուն, Արազափ, Արգավանդ, Տանձուտ, Փշատավան, Ջանֆիդա բնակավայրերում։
Ամփոփելով հարցումների արդյունքները և առկա խնդիրները հաշվի առնելով՝ «Թիմ Ռեսուրս» ՀԿ-ն, REGIONS TV-ի հետ համատեղ իրականացվող «Մարզային կյանքն իրականում» նախագծի շրջանակում, բանավեճ-քննարկում կանցկացնի Արմավիրի մարզում: Օրակարգ է ներառվել կարևորագույն 2 թեմա․
-անվտանգություն, հայ-թուրքական հարաբերությունների կարգավորման հեռանկարներ՝ հնարավոր վտանգներով և դրական կողմերով․
-գյուղատնտեսության ոլորտի՝ տվյալ տարածաշրջանին բնորոշ խնդիրներն ու դրանց լուծման ուղիները․
Հիշեցնենք, որ «Թիմ Ռեսուրս» ՀԿ-ն, REGIONS TV-ի հետ համատեղ, իրականացնում է «Մարզային կյանքն իրականում» նախագիծը, որը ներգրավելով հենց համայնքի բնակչին՝ նպատակ ունի բարձրաձայնել ՀՀ 5 մարզերում առկա կարևոր խնդիրները և առավելագույնս հանրայնացնել ու տեսանելի դարձնել դրանք մեդիա հարթակներում, նաև մասնակից դարձնել համայնքների ղեկավարներին, կառավարության ներկայացուցիչներին, համապատասխան կառույցների ներկայացուցիչներին՝ համատեղ լուծումներ գտնելու նպատակով։
«Մարզային կյանքն իրականում» նախագծի հերթական դեբատ-քննարկումը տեղի կունենա փետրվարի 7-ին՝ Արմավիր քաղաքում:
