Երևանի քաղաքապետը կրկին հետքայլ արեց․մայրաքաղաքի տրանսպորտային համակարգում նոր, 150 դրամամանոց ուղևորատոմս կլինի
Տիգրան Ավինյանը նաև հայտնեց, որ նախատեսվում է հունվար և փետրվար ամիսներին ձեռք բերված անսահմանափակ փաթեթների ժամկետները երկարացնել ևս մեկ ամսով
Փետրվարից 1-ից Երևանի հանրային ուղևորափոխադրման համակարգում կներդրվի 150 դրամամանոց նոր ուղևորատոմս՝ մեկ ուղևորության ա համար։ Այս մասին այսօր հայտարարեց Երևանի քաղաքապետ Տիգրան Ավինյանը ֆեյսբուքյան տեսանյութով։
Նոր ուղևորատոմսը գործելու է ամբողջ 2025 թվականի ընթացքում։
Ավինյանի ներկայացմամբ՝ առաջարկվող մեկ ուղևորության համար սահմանված 150 դրամը ամեն տարի կարող է փոփոխվել առավելագույնը 10 դրամով և միայն շարունակվող բարեխումների պայմաններում:
Երևանի քաղաքապետը հայտնեց, որ նախատեսվում է հունվար և փետրվար ամիսներին ձեռք բերված անսահմանափակ փաթեթների ժամկետները երկարացնել ևս մեկ ամսով:
Հիշեցնենք, որ մայրաքաղաքում բողոքի ցույցեր էին ընթանում ընդդեմ տրանսպորտի ուղևորատոմսի թանկացման։ Չնայած Ավինյանը բողոքի ցույցերին զուգահեռ հայտարարել էր, որ հետ քայլ չի լինի, սակագինը չեն իջեցնի, սակայն հունվարի 22-ին հայտնեց, որ նոր սակագներ են սահմանելու, որը կքննարկեն փետրվարի 11-ի նիստում։
Առաջարկվող սակագներն են՝
10 ուղևորություն – 2000 ՀՀ դրամ՝ օգտագործման ժամկետը 45 օր, ներկայիս 2200 ՀՀ դրամի և 30 օրվա փոխարեն։
300 ՀՀ դրամ՝ օգտագործման ժամկետը 180 րոպե, ներկայիս 90 րոպեի փոխարեն։
1 օր – 900 ՀՀ դրամ՝ անսահմանափակ ուղևորություններ, ներկայիս 8 ուղևորափոխադրման սահմանափակման փոխարեն։
7 օր – 5000 ՀՀ դրամ՝ անսահմանափակ ուղևորափոխադրումներ, ներկայիս 30 ուղևորափոխադրման սահմանափակման փոխարեն։
Նշենք, որ փետրվարի 1-ից մայրաքաղաքում ուղևորափոխադրման նոր սակագներ են սահմանվել՝ 90 րոպե գործող 300 դրամից մինչև տարեկան 90 հազար դրամ։
